Thursday, July 23, 2015

தால் மக்னி / Dal Makhni

நாங்கள் ஆக்ரா போய் திரும்பி வரும் வழியில் மதுரா பக்கம் ஒரு ரோட்டோர கடையில் இந்த தால் மக்னியும் ஸ்பைசியாக ஒரு வெஜ் சப்ஜியும் சுட்ட ரொட்டியும் சாப்பிட்டோம். அதில் இருந்து இந்த தால் மக்னி வீட்டில் செய்ய ஆரம்பிச்சாச்சு.


தேவையான பொருட்கள் & செய்முறை:

வேக வைக்க:
உளுந்து - 1 கப்
கிட்னி பீன்ஸ் (ராஜ்மா) - 2 டேபிள்ஸ்பூன்
மஞ்சள் தூள் - கால் டீஸ்பூன்.
தாளிக்க :
எண்ணெய் - 2 டேபிள்ஸ்பூன் அல்லது பட்டர்.
சீரகம் - அரை டீஸ்பூன்
நறுக்கிய பச்சை மிளகாய் - 1
2 பெரிய  வெங்காயம்,2 பெரிய தக்காளி அல்லது தக்காளி ப்யூரி - ஒரு கப்,
6 பல் பூண்டு,அதே அளவு இஞ்சி நறுக்கிக் கொள்ளவும்.
மிளகாய்த்தூள் - 1 டீஸ்பூன்
கரம் மசாலா - கால் டீஸ்பூன்
விரும்பினால் ஃப்ரெஷ் கிரீம் - 1-2 டேபிள்ஸ்பூன்.
உப்பு - தேவைக்கு.
இறுதியாக சேர்க்க:நறுக்கிய மல்லி இலை. பட்டர் அல்லது கிரீம்.

முதலில் 8 மணி நேரம்  உளுந்து ராஜ்மாவை தேவைக்கு தண்ணீர்,சேர்த்து ஊற வைக்கவும்.


ஊறிய பயறை  3 கப் தண்ணீர், மஞ்சள் பொடி  சேர்த்து குக்கரில் முதல் 2 விசில் வந்த பின்பு அடுப்பை குறைத்து 15 நிமிடம் வேக வைக்கவும்.ஆவியடங்கிய பின்பு குக்கரை திறந்து மசித்து விடவும்.

2 பெரிய  வெங்காயம்,2 பெரிய தக்காளி, 6 பல் பூண்டு,அதே அளவு இஞ்சி, ஒரு பச்சை மிளகாய் நறுக்கிக் கொள்ளவும். தாளிக்க எண்ணெய் - 2 டேபிள்ஸ்பூன் ஒரு வாணலியில் விடவும்.
 சீரகம் பொரிந்தவுடன் இஞ்சி பூண்டு சேர்க்கவும்.
 வெங்காயம் பச்சை மிளகாய் சேர்க்கவும்.வதக்கவும்.
 நறுக்கிய தக்காளி அல்லது தக்காளி  ப்யூரி சேர்க்கலாம். உப்பு சேர்த்து வதக்கவும்.



 மிளகாய்த்தூள் சேர்க்கவும்.
 
 நன்கு ஒரு சேர தண்ணீர் தெளித்து வதக்கவும்.
 வேக வைத்து மசித்த உளுந்து ராஜ்மாவை சேர்க்கவும்.

கரம் மசாலா சேர்க்கவும். காரம் தேவைப்பட்டால் சிறிது மிளகாய்த்தூள் சேர்க்கவும்.

நன்கு கொதிக்க விடவும். உப்பு சர் பார்க்கவும். அடுப்பை அணைக்கும்  சமயத்தில் ஒரு ஸ்பூன் பட்டர் சேர்க்கவும். பட்டர் இல்லையெனில் நெய் சேர்க்கலாம்.
விரும்பினால் சிறிது ஃப்ரெஷ் கிரீம் சேர்க்கலாம். கலந்து விட்டு நறுக்கிய மல்லி இலை தூவி பரிமாறவும்.
 செமையாக இருக்கும்.சத்தானதும் கூட.
 இந்த தால் மக்னி சுட்ட சப்பாத்தி அல்லது  ஹோல் மீல் ப்ரெட்  உடன் சாப்பிட சூப்பராக இருக்கும்.

Monday, July 20, 2015

மட்டன் உலர்த்தியது / Mutton Ularthiyathu / Mutton Chukka / Beef Ularthiyathu


தேவையான பொருட்கள்;
வேக வைக்க:
போன்லெஸ் மட்டன் - அரைக்கிலோ
மஞ்சள் தூள் - கால் - அரை டீஸ்பூன் 
மல்லித்தூள்  - 1 டீஸ்பூன் 
கருவேப்பிலை - 1 இணுக்கு
இஞ்சி பூண்டு பேஸ்ட் குவியலாக - 1 டீஸ்பூன்
பச்சை மிளகாய் கீறியது - 2
உப்பு - தேவைக்கு.
தாளித்து உலர்த்த :
தேங்காய் எண்ணெய் - 2 டேபிள்ஸ்பூன் அல்லது ரீபைண்ட் ஆயில்
கடுகு - அரைடீஸ்பூன்
சின்ன வெங்காயம் நறுக்கியது - 100 கிராம்
நறுக்கிய இஞ்சி - 2 டீஸ்பூன்
நறுக்கிய பச்சை மிளகாய் - 1
கருவேப்பிலை - 1 இணுக்கு
கொரகொரப்பாக பொடித்த மிளகுத்தூள் - 1 டீஸ்பூன் அல்லது தேவைக்கு.


செய்முறை:
மட்டன் துண்டுகளை சுத்தம் செய்து நன்கு அலசி தண்ணீர் வடித்துக் கொள்ளவும். அத்துடன் மேற்சொன்ன பொருட்கள் சேர்த்து விரவி கால் மணி நேரம் வைக்கவும்.

குக்கரில் எடுத்து வைத்து அரை கப் தண்ணீர் சேர்த்து 5 விசில் மீடியம் ப்லேமில் அல்லது நன்கு வேக விட்டு எடுக்கவும்.
வெந்த பின்பு இப்படியிருக்கும். தண்ணீர் ஊறியிருந்தால் வற்ற வைக்கவும்.
மட்டனை உலர்த்த தேவையான பொருட்களை தயார் செய்து கொள்ளவும்.
ஒரு கடாயில் எண்ணெய் விடவும். எண்ணெய் சூடானவுடன் விரும்பினால் கடுகு அரை டீஸ்பூன் சேர்க்கலாம். பச்சை மிளகாய் ,இஞ்சி சேர்க்கவும்.
வதக்கவும்.
நறுக்கிய வெங்காயம் கருவேப்பிலை சேர்த்து நன்கு பிரட்டி விடவும் .சிறிது தேவைக்கு உப்பு சேர்க்கவும்.விரைவில் வெங்காயம் வதங்கி விடும்.
வேக வைத்த மட்டன் சேர்க்கவும்.
நன்கு சுருள வதக்கவும்.
மிளகுத்தூள் சேர்க்கவும்.நன்கு பிரட்டவும்.

நறுக்கிய மல்லியிலை அலங்கரித்து பரிமாறவும்.

சுவையான மட்டன் உலர்த்தியது ரெடி.

ப்லைன் ரைஸ் ,கட்டிப்பருப்பு,ரசம் உடன் பரிமாறலாம் அல்லது விருந்தின் போது இதனையும் ஒரு வகையாக செய்து அசத்தலாம்.
இதே முறையில் பீஃப் -இல் கூட முயற்சிக்கலாம்.


Sunday, July 19, 2015

கோழி ரசம் / Chicken Rasam

தேவையான பொருட்கள்;

முதலில் குக்கரில் வேக வைக்க:
கோழி எலும்புடன் கூடிய துண்டுகள் - 100 கிராம்
பெரிய தக்காளி - 1
சின்ன வெங்காயம்  சிறிது
பச்சை மிளகாய் - 2
மஞ்சள் தூள் - அரைடீஸ்பூன்
உப்பு - தேவைக்கு.
புளி தேவைக்கு சிறிது அளவு  ஊற வைக்கவும்.
ரசப் பொடிக்கு:


மிளகு - 1 டீஸ்பூன்
சீரகம்  - அரை டீஸ்பூன்
சோம்பு - அரை டீஸ்பூன்
மிளகாய் வற்றல் - 1டீஸ்பூன்
முழு மல்லி - 1டீஸ்பூன்
உளுத்தம் பருப்பு - 1 டீஸ்பூன்
உங்க ருசிக்கு தக்க பொருட்களை கூட்டிக் கொள்ளலாம். இது தான் நான் சேர்க்கும் அளவு.
வறுத்துப் பொடிக்கவும்.அத்துடன்
தட்டிக் கொள்ள:
பூண்டு -  4  பெரிய  பல்
சின்ன வெங்காயம் - 4
தாளிக்க:
நல்ல எண்ணெய் - 1 டேபிள்ஸ்பூன்
கடுகு, உ.பருப்பு ,வெந்தயம் - சிறிது
வற்றல் - 1
கருவேப்பிலை - 2 இணுக்கு
பெருங்காயம் - கால் டீஸ்பூன்.
அலங்கரிக்க:
நறுக்கிய மல்லி இலை.

செய்முறை:

 முதலில் சுத்தம் செய்து நன்கு அலசிய எலும்புடன் கூடிய கோழித்துண்டுகளை குக்கரில் மேற் சொன்னவாறு பொருட்களுடன் 3 கப் தண்ணீர் சேர்த்து மூடி மூன்று விசில் விட்டு  வேகவைத்து எடுக்கவும்.
 தாளிக்க சொன்னவற்றை சேர்த்து தாளிக்கவும்.
  வெந்த கோழியை  அதில் உள்ள சூப்புடன் தாளித்த பாத்திரத்தில் சேர்க்கவும்.

தயார் செய்த ரசப்பொடி சேர்க்கவும்.கொதிக்க விடவும்.
 தேவைக்கு புளித்தண்ணீர் சேர்க்கவும். உப்பு சரிபார்க்கவும்.தேவைக்கு தண்ணீர் சேர்க்கவும்.
 நுரை கூடி வரும்.

நறுக்கிய மல்லியிலை அலங்கரித்து சூடான சோற்றுடன் பரிமாறவும்.