Monday, February 28, 2011

கார கோஸ் பொரியல்

தேவையான பொருட்கள் ;
முட்டை கோஸ் - 200கிராம்
வெங்காயம் - 100கிராம்
மிளகாய்த்தூள் - அரைடீஸ்பூன்
எண்ணெய் - 2டேபிள்ஸ்பூன்
கடுகு,உ.ளுத்தம் பருப்பு - 1டீஸ்பூன்
கருவேப்பிலை - 2இணுக்கு
உப்பு - தேவைக்கு
வெங்காயம் முட்டை கோஸ் நறுக்கி கொள்ளவும்.வாணலியில் எண்ணெய் விட்டு காயவும்,கடுகு உ,பருப்பு,கருவேப்பிலை போட்டு வெடிக்கவும்,வெங்காயம் சேர்த்து வதக்கவும், அத்துடன் முட்டை கோஸ் சேர்த்து நன்கு வதக்கவும்.

நன்கு வதங்கியதும் மிளகாய்த்தூள், உப்பு சேர்க்கவும். நன்கு பிரட்டி அடுப்பை சிம்மில் வைத்து சிறிது நேரம் மூடி கோஸ் நன்கு வதங்கியதும் திறக்கவும்.

சுவையான இலகுவாக செய்யக்கூடிய கார கோஸ் பொரியல் ரெடி. இதனை சாதத்துடன் பரிமாறலாம். சப்பாத்தி, தோசையில் ரோல் செய்தும் சாப்பிடலாம்.
காய்கறிகளை சிம்பிளாக சமைக்கும் பொழுது தான் அதன் ருசி அபரிமிதமாக இருக்கும்.பேச்சிலர்ஸ்க்காக இந்த இலகுவான குறிப்பை கொடுத்து இருக்கிறேன்.விரும்பினால் தேங்காய் துருவல் சேர்க்கலாம்.
--ஆசியா உமர்.

Saturday, February 26, 2011

சிக்கன் ஃப்ரான்க்ஸ் சாண்ட்விச் (நம்ம டேஸ்டில்)


சிக்கன் ஃப்ரான்க்ஸ் டீஃப்ராஸ்ட் செய்யாமல் குக்கரில் தண்ணீர் வைத்து ஒரு விசில் வைத்து எடுக்கவும்.
தேவையான பொருட்கள்;
சிக்கன் ஃப்ரான்க்ஸ் - 2
லாங் பன் - 2
டொமட்டோ கெச்சப் -2டீஸ்பூன்
புளிக்காத கெட்டி தயிர் - 2டேபிள்ஸ்பூன்
ஆலிவ் ஆயில் - 2டீஸ்பூன்
வீட்டு குழம்பு மசாலா -1டீஸ்பூன்
அல்லது கறி மசாலா.


வேக வைத்த ஃப்ரான்க்ஸில் ஆலிவ் ஆயில்,மசாலா தடவி ஓவனில் 30செகண்ட் வைத்து எடுக்கவும்.

பன் நீளவாக்கில் பாதியாக கட் செய்து முதலில் தயிர் தடவவும்.

பின்பு பன்னின் ஒரு பக்கம் டொமட்டோ சாஸ் தடவவும்.

ஓவனில் ரெடி செய்த ஃப்ரான்க்ஸ் பன்னின் நடுவில் வைக்கவும்.10-20செகண்டு ரெடி செய்த சாண்ட்விச் வைத்து எடுக்கவும்.


பின்பு ரெடி செய்த சாண்ட்விச்சை கட் செய்து பரிமாறவும். சாண்ட்விச்சில் லெட்டூஸ் இலைகள் வைத்தும் பரிமாறலாம்.இது நான் செய்த சாண்ட்விச் நம்ம ஸ்டைலில் வித்தியாசமான ருசியாக இருக்கும்.

என் மகன் செய்த சாண்ட்விச் படம் எடுத்தேன், அவர் மயோனைஸ் ,மஸ்டர்ட் சாஸ் மற்ற சாஸ் எல்லாம் சேர்த்து செய்திருக்கிறார்.இந்த சாஸ் ட்ரேயில் என்ன என்ன பிரியமோ அத்தனையும் சேர்த்து செய்திருக்கிறார்,ரெசிப்பி கேட்டேன், சீக்ரெட் என்று சொல்லிவிட்டார்.

Thursday, February 24, 2011

சுறா முருங்கைக்கீரை ஆணம் & சுறாப்புட்டு

சுறா முருங்கைக்கீரை ஆணம் தேவையான பொருட்கள்: சுறா மீன் துண்டுகள் - அரைக்கிலோ முருங்கைக்கீரை - ஒரு கப் சின்ன வெங்காயம் -100கிராம் தக்காளி -1 பூண்டுபல்- 10 மிளகுத்தூள் - ஒன்னரை டீஸ்பூன் சீரகத்தூள் - முக்கால் டீஸ்பூன் மஞ்சள் தூள் - முக்கால் டீஸ்பூன் மல்லித்தூள் -2டீஸ்பூன் மீன் மசாலா - 1டீஸ்பூன் (விரும்பினால்) தேங்காய் - 3டேபிள்ஸ்பூன் புளி - நெல்லியளவு உப்பு - தேவைக்கு நல்ல எண்ணெய் -4டேபிள்ஸ்பூன் கடுகு,உ.பருப்பு - தலா ஒரு டீஸ்பூன் சுறா மீனை நன்கு கழுவி சுத்தமாக எடுத்துக் கொள்ளவும்.
மிக்ஸியில் குறிப்பிட்ட மசாலா தூள் வகைகள், பூண்டு,சின்ன வெங்காயத்தில் முக்கால் பாகம், தக்காளி,தேங்காய் துருவல் போட்டு நன்கு அரைத்து எடுக்கவும். புளி சிறிது கரைத்து எடுக்கவும்.
குழம்பு வைக்கும் பாத்திரத்தில் மிக்ஸியில் அரைத்த மசாலா,தேவைக்கு தண்ணீர் சேர்த்து கொதிக்க வைக்கவும்.மசாலா வாடை அடங்கியதும். சிறிதளவு புளிக்கரைசல் விடவும்.நன்கு மூடினால் பொங்கி வடியும், திறந்தே கொதிக்கட்டும்.
அதற்குள் முருங்கைக்கீரையை ஆய்ந்து அலசி எடுக்கவும்.
கொதித்த ஆணத்தில் சுறா மீன் துண்டுகளை போடவும்.மீன் வேகட்டும். எலும்பு துண்டுகள் தவிர மற்ற துண்டுகளை புட்டுவிற்கு தனியாக எடுத்து வைக்கவும்.
ஆணத்தில் ஆய்ந்த முருங்கைக்கீரையை போடவும்.நன்கு வேகட்டும்.
ஒரு பாத்திரத்தில் தாளிக்க எண்ணெய் விட்டு, காய்ந்ததும்,கடுகு,உ.பருப்பு போட்டு வெடித்ததும் மீதமுள்ள நறுக்கிய வெங்காயம் போட்டு நன்கு சிவற வதக்கவும்.
கொதித்து கொண்டிருக்கும் சுறா முருங்கைக்கீரை ஆனத்தில் தாளிசத்தை கொட்டவும். அடுப்பை அணைத்து விடவும். நெலு நெலுன்னு ஆணம் சூப்பராக இருக்கும்.
சுவையான சத்தான சுறா முருங்கைக்கீரை ஆணம் ரெடி. குளிர்,பனிக்காலத்தில் செய்து சாப்பிட்டால் உடல் நலத்திற்கு நல்லது.பால் கொடுக்கும் தாய்மார்களுக்கும் நல்லது.இந்த ஆணத்திற்கு, பூண்டு, நல்ல எண்ணெய், முருங்கைக்கீரை தான் தனி ருசியை தரும். ப்லைன் ரைஸில் விட்டு சாப்பிட அருமையாக இருக்கும்,பொரித்த அப்பளம்,சுறாப்புட்டு உடன் பரிமாறலாம்.

சுறாப்புட்டு :

சுறா மீன் வேகவைத்தது - கால் கிலோ

வெங்காயம் - கால் கிலோ

பூண்டு -6பல்

தக்காளி - 1

பச்சை மிள்காய் - 2

தேங்காய் -3டேபிளஸ்பூன் மிளகுத்தூள் - அரைஸ்பூன்

சீரகத்தூள் - அரைஸ்பூன்

மிளகாய்த்தூள் -அரைஸ்பூன்(விரும்பினால்)

மல்லி,கருவேப்பிலை - சிறிது

எண்ணெய் -3டேபிள்ஸ்பூன்

கடுகு,உ.பருப்பு - 1டீஸ்பூன்

உப்பு - தேவைக்கு

வெங்காய்ம், பூண்டு, தக்காளி, மல்லி இலை பொடியாக நறுக்கி கொள்ளவும். தேங்காய் பச்சை மிளகாய் மிக்சியில் பரபரவென்று அரைத்து வைக்கவும்.
ஆணத்தில் இருந்து எடுத்த எலும்பு இல்லாத மீன் ஆற வேண்டும்.ஆணம் வைக்கவில்லை என்றால் தனியாகவும் மீனை கழுவி மஞ்சள் தூள்,உப்பு போட்டு ஒரு பாத்திரத்தில் தண்ணீர் விடாமல் வெந்து எடுக்கலாம்.
மீனை இப்படி உதிர்த்து கொள்ளவும்.
கடாயில் எண்ணெய் விட்டு கடுகு, உ.பருப்பு,கருவேப்பிலை தாளித்து நறுக்கியவற்றை சேர்த்து சிறிது உப்பு சேர்த்து வதக்கவும்,சிறிது நேரம் மூடவும்.
வெங்காயம், தக்காளி,பூண்டு வதங்கிய பின்பு உதிர்த்த மீனை சேர்க்கவும், மிளகுத்தூள், சீரகத்தூள் சேர்க்கவும், காரம் தேவைப்பட்டால் மிளகாய்த்தூள் சேர்க்கலாம்.பிரட்டி விடவும், உப்பு சரி பார்க்கவும்.

அரைத்த தேங்காய் மிளகாய் கலவையை சேர்க்கவும்.நன்கு பிரட்டி விடவும்,புளிப்பு தேவைப்பட்டால் அரை எலுமிச்சை பழம் பிழியவும், நன்கு பிரட்டி விடவும்.

.
சுவையான சுறாப்புட்டு ரெடி.

இதனை சாதத்துடன் தொட்டு சாப்பிட அருமையாக இருக்கும், மீதியானால் ப்ரெட்டில் வைத்து சாண்ட்விச் செய்தும் சப்பாத்தியில் ரோல் செய்தும் சாப்பிடலாம்.

என்னுடைய மற்றொரு சுறாப்புட்டு ரெசிப்பியை இங்கு காணலாம்.


--ஆசியா உமர்.


Wednesday, February 23, 2011

பூசணிக்காய் பருப்பு

தேவையான பொருட்கள்:
சாம்பல் பூசணிக்காய் - கட் செய்தது ஒரு தட்டு முழுவதும்.
(நான் வாங்கிய துண்டு 800கிராம் இருந்தது)
பெரிய வெங்காயம் - 1
பெரிய தக்காளி -1
மல்லி,கருவேப்பிலை -சிறிது
பச்சை மிளகாய் -2-4
தேங்காய் - 4டேபிள்ஸ்பூன்
பருப்பு - 100கிராம்
மஞ்சள் தூள் - அரைடீஸ்பூன்
சீரகத்தூள் - அரைடீஸ்பூன்
பூண்டு பல் - 6
கடுகு,உ.பருப்பு -தலா ஒரு டீஸ்பூன்
எண்ணெய் - 2டேபிள்ஸ்பூன்
மிளகாய் வற்றல் -2
உப்பு - தேவைக்கு

பருப்புடன்,மஞ்சள் தூள்,சீரகத்தூள்,பூண்டு பல் ,தேவைக்கு தண்ணீர் சேர்த்து வேகவைத்து எடுக்கவும்.
பூசணிக்காயை கட் செய்து அலம்பி வைக்கவும்.


வெந்த பருப்புடன்,நறுக்கிய தக்காளி,வெங்காயம்,பூசணிக்காய்,மல்லி இலை சேர்க்கவும்.உப்பு சேர்க்கவும்.


தேங்காய் துருவலுடன் மிளகாய் சேர்த்து பரபரவென்று அரைத்து கொள்ளவும்.

அரைத்த தேங்காயை பூசணிக்காய் பருப்புடன் சேர்க்கவும்,குக்கரை மூடி மீண்டும் ஒரு விசில் விடவும்.

ஒரு வாணலியில் எண்ணெய் விட்டு காய்ந்ததும்,கடுகு,உ.பருப்பு, மிளகாய் வற்றல், கருவேப்பிலை போட்டு வெடிக்கவும், நறுக்கிய வெங்காயம் சேர்த்து சிவற வதக்கி தாளித்ததை வெந்த பூசணி பருப்பில் கொட்டவும்.கலந்து விடவும்.


சுவையான பூசணி பருப்பு ரெடி.
இது ப்லைன் சாதம், சப்பாத்திக்கு அருமையாக இருக்கும்.குழந்தைகளுக்கு மிகவும் பிடிக்கும்.பூசணி துண்டுகள் பார்க்க கண்ணாடி போல் இருக்கும்.எங்க ஊரில் இதனை தடியங்காய் என்று சொல்வது வழக்கம்.காயில் விதை முற்றாமல் இருந்தால் அத்துடன் நறுக்கி சமைக்கலாம்.
--ஆசியா உமர்.

Tuesday, February 22, 2011

ஈசி கோபி ஃப்ரை

தேவையான பொருட்கள்;
காளிப்ளவர் - கட் செய்த பின்பு அரைக்கிலோ
கார்ன்ஃப்லோர் -2 டேபிள்ஸ்பூன்
மைதா - 2 டேபிள்ஸ்பூன்
சிக்கன் 65மசாலா- 2 டீஸ்பூன்
எண்ணெய் - தேவைக்கு
உப்பு - சிறிது தேவைப்பாட்டால்.

நான்கு நபர்களுக்கு.

செய்முறை;

காளிப்ளவரை இப்படி மெல்லிய துண்டாக கட் செய்து கொள்ளவும்.

கொதிக்கும் நீரில் சிறிது உப்பு, நறுக்கிய காளிப்ளவர் போட்டு அரைவேக்காட்டில் அடுப்பை அணைக்கவும்.
உடன் காளிப்ளவரை வடிகட்டி வைக்கவும்.

காளிப்ளவர் ஆறியவுடன் சிக்கன்65மசாலா ,கார்ன் ஃப்லோர் சேர்த்து கலந்து வைக்கவும். மசாலாவில் உப்பு இருக்கும். அதனால் உப்பு தேவைப்பட்டால் சிறிது சேர்க்கவும்.

குறைந்தது ஒரு அரை மணி நேரம் ஊறட்டும்.

வாணலியில் எண்ணெய் நன்கு காய்ந்ததும் போட்டு முறுக பொரித்து எடுக்கவும்.

பொரித்து எடுத்து பேப்பர் டவலில் வைக்கவும்.சூடாக பரிமாறவும்.

சுவையான கோபி ஃப்ரை ரெடி.
இது எல்லாவகையான ரைஸ் வகைகளுடனும், ஸ்டார்ட்டராகவும் சாப்பிடலாம்.

--ஆசியா உமர்.