சமைத்து அசத்தலாம்

பேச்சிலர்ஸ் தக்காளி எலுமிச்சை ரசம்./ Bachelor's Tomato Lemon Rasam

2012-02-10T19:04:00.016+04:00

தேவையான பொருட்கள்:

தக்காளி -2

எலுமிச்சை - 1

பச்சை மிள்காய் - 1

மல்லி கருவேப்பிலை - சிறிது

மிளகு - 1டீஸ்பூன்

சீரகம் - அரைடீஸ்பூன்

பூண்டு - 4பல்

பெருங்காயப் பொடி - கால்டீஸ்பூன்

மஞ்சப்பொடி - கால்டீஸ்பூன்

எண்ணெய் - 2டீஸ்பூன்

கடுகு - அரைடீஸ்பூன்

மிளகாய் வற்றல் - 1

உப்பு - தேவைக்கு.
தக்காளியை நன்கு கழுவி ஒரு ரசம் வைக்கும் பாத்திரத்தில் எடுத்து கொண்டு கொதிக்கும் நீரை விடவும்.ஒரு நிமிடம் கழித்து மேல் தோலை உரித்து விடவும்.உரித்த தக்காளியை கையால் நன்கு பிணைந்து கொள்ளவும்.அடுப்பில் வைத்து ஒரு கப் தண்ணீர் சேர்த்து ,மஞ்ச பெருங்காயப் பொடி சேர்த்து கொதிக்க வைக்கவும்.விரும்பினால் ஒரு பச்சை மிளகாய் கிள்ளி போடலாம்.

மிக்ஸி கப்பில் மிளகு சீரகம் பூண்டு கொரகொரப்பாக அரைத்து எடுக்கவும்.

அரைத்த பொடியை கொதிக்கும் தக்காளி கரைசலில் போடவும்.ஒரு நிமிடம் கொதிக்கட்டும்.

நறுக்கிய மல்லி இலை,எலுமிச்சை பிழியவும்.உப்பு சேர்க்கவும், அடுப்பை சிம்மில் வைக்கவும்.

தாளிப்பு கரண்டியில் எண்ணெய் விட்டு கடுகு,மிளகாய் வற்றல்,கருவேப்பிலை தாளித்து கொட்டவும்.

அடுப்பை அணைக்கவும்.கலந்து விட்டு சிறிது மூடி வைக்கவும்.

சுவையான தக்காளி எலுமிச்சை ரசம் ரெடி.

எளிதில் செய்யக் கூடியது.சுட சுட சாதம் ஃபிஷ் ஃப்ரை அல்லது சேனை அல்லது உருளை ஃப்ரையுடன் சாப்பிட சுவை அபாரமாக இருக்கும்.துபாயில் வாழும் எங்க ஊர் பேச்சிலர்ஸ் என் குறிப்புக்கள் பார்த்து செய்து சமைத்து அசத்துவதாக என்னிடம் பகிர்ந்ததால் அவர்களுக்கு தகுந்த ஈசி குறிப்புகளும் இனி கொடுக்க உள்ளேன்.

--ஆசியா உமர்.

சமையல் பொருட்கள் -English Tamil தமிழ்

2012-02-08T07:06:00.014+04:00

சமையல் சம்பந்தப்பட்ட இந்த தொகுப்பு நிச்சயம் பலருக்கு பயன் அளிக்கும்.தமிழில் நாம் பயன்படுத்தும் சில உணவு பெயர்களுக்கு ஆங்கிலத்தில் என்ன பெயரோ என்று குழம்புபவர்களுக்கும் உதவியாக இருக்கும்.ஆங்கிலத்தில் சொல்லும் உணவு பெயர்களுக்கு தமிழில் என்னவாக இருக்கும் என்று யோசிப்பவர்களுக்கும் இதில் தேடினால் பல வார்த்தைகளுக்கு விடை கிடைக்கலாம்.தங்களுக்கு தெரிந்த இது போன்ற இந்த தொகுப்பில் அடங்கக் கூடிய உணவு குறித்த வார்த்தைகளை தெரிவித்தால் இதனில் சேர்த்து விடுகிறேன்.

ஆங்கிலத்திலும் சமையல் குறிப்பு கொடுக்க ஆரம்பித்த பின்பு ஒரு சில நேரம் சில தமிழ் வார்த்தைகளுக்கு சட்டென்று ஆங்கில வார்த்தைகள் பிடிபடாமல் போய்விடுகிறது.அந்த நேரத்தில் எங்கு போய் தேடுவது.அப்பொழுது இவை உதவியாக இருக்குமே என்று தான் இந்த தொகுப்பை சேமித்து வைத்திருந்தேன்.

இது உங்களுக்கும் பயன்பட்டால் மிக்க மகிழ்ச்சியே.

English to Tamil

English Tamil தமிழ்

Vegetables /காய்கறிகள்

Bottle gourd Suraikkai சுரைக்காய்

Cauli flower Kali flower காலிபிளவர்

Capsicum Koda milagai குடைமிளகாய்

Carrot Carrot கேரட்
Red Chilly Kaanja Milagai வரமிளகாய்
Green Chilly Patchai Milagai பச்சை மிளகாய்
Coconut Thengai தேங்காய்
Sambar Onion Chinna (or) Sambar Vengayam சின்ன வெங்காயம்
Spring Onion Vengaya thaal (leaves) வெங்காயத்தாள்
Onion Vengayam வெங்காயம்
Green Peas Pachai Pattani பச்சைப் பட்டாணி
Potato Urulai kilangu உருளைக்கிழங்கு
Tomato Thakkali தக்காளி
Mint leaves Pudhina புதினா
Okra (Ladies finger) Vendaikaai வெண்டைக்காய்
Drumstick Murungaikaai முருங்கைக்காய்
Common Beans Beans பீன்ஸ்
Village Beans Avaraikaai அவரைக்காய்
Lined gourd / Ridge gourd Peerkankaai பீர்கங்காய்
Snake gourd Pudalankaai புடலங்காய்
Mushroom Kaalaan காளான்
Green Plantain Vaalaikaai வாழைக்காய்
Garlic Poondu பூண்டு
Tamarind Puli புளி
Ginger Ingi இஞ்சி
Curry leaves Kariveppilai கருவேப்பிலை
Drumstick leaves Murungai Keerai முருங்கைக்கீரை
Dry Ginger Sukku சுக்கு
Yam Karunai Kilangu கருணைக்கிழங்கு

Elepahant Yam -Senai kilangu சேனைக்கிழங்கு
Dry coconut Copparai கொப்பரை
Plantain Flower Vaalaippu வாழைப்பூ
Colacasia Seppan kilangu சேப்பங்கிழங்கு
Bitter gourd Pakarkaai பாவக்காய்
Bottle Gourd Surakkaai சுரக்காய்
Brinjal / Eggplant Kathirikkaai கத்திரிக்காய்
Cucumber Vellarikkaai வெள்ளரிக்காய்
Chayote Chow Chow சௌ சௌ
Curry Leaves Kariveppillai கருவேப்பிலை
Gherkins Kovakkaai கோவக்காய்
Cluster Beans Kothavarangaai கொத்தவரங்காய்

Chickpeas - kondaikadalai - கொண்டைக்கடலை
Cabbage Muttai Kose முட்டைகோஸ்
Grated Coconut Thuruviya Thengaai தேங்காய்
Raw Mango Maangai மாங்காய்
Dry Coconut kopparai கொப்பரை தேங்காய்
Yardlong bean Payathamkaai பயத்தங்காய்
Mushroom Kaalaan காளான்
Ash Gourd Poosanikkaai சாம்பல் பூசணி
Pumkin Manjal Poosani பூசணி
Tropical Root Maravalli Kilangu மரவள்ளிகிழங்கு
Raddish Mullangi முள்ளங்கி
Sweet Potato Sarkarai Valli சக்கரை வள்ளி

Asafoetida Perungayam பெருங்காயம்
Bay Leaves Bringe Ilai பிரின்ஜ் இலை
Cardamom Yelakkai ஏலக்காய்
Cashewnut Mundhiri paruppu முந்திரிப் பருப்பு
Nutmeg Jadhikkai ஜாதிக்காய்
Cinnamon Pattai பட்டை
Cloves kirambu, lavangam கிராம்பு
Coriander leaves Kothamalli கொத்தமல்லி
Corn flour Makka cholam maavu மக்காச்சோளம் மாவு
Curds Thayir தயிர்
Honey Then தேன்
Jaggery Vellam வெல்லம்
Raisins Thiratchai திராட்சை
Saffron Kungumapoo குங்குமப்பூ
Spinach Pasalai keerai பசலைக் கீரை
Suji Ravai ரவை
Turmeric Manjal மஞ்சள்
Vermicelli Semia சேமியா
Red Chilly Powder Milakaai Thool மிளகாய் பொடி
Coriander Powder Thaniyaa Thool தனியா பொடி
Bengal Gram Flour Kadalai Maavu கடலை மாவு
Wheat Flour Gothumai Maavu கோதுமை மாவு
Rice Floor Arisi Maavu அரிசி மாவு
Maida Maida Maavu மைதா மாவு
Sugar Sarkarai சர்க்கரை
Ghee Nei நெய்
Oil Refined Oil சமையல் எண்ணை
Gingelly Oil Nallennai நல்லெண்ணை
Groundnut Oil Kadallennai கடலெண்ணை
Butter Vennai வெண்ணெய்
Buttermilk More மோர்
Sago Javvarisi ஜவ்வரிசி

Kadai / Wok / pan Vessel to fry / deep fry வாணலி
Pressure Cooker Cooker குக்கர்
Vessel / bowl Paathiram பாத்திரம்
Electric Mixer Mixie மிக்ஸி
Plain Pan / Griddle Dosa Stone தோசைக்கல்
Puri / Chapathi pad Chapathi Kal சப்பாத்திக்கல்
Plate Plate தட்டு
Knife Kathi கத்தி
Filter Vadikatti வடிகட்டி
Grinder Grinder கிரைண்டர்

Fruits / பழம் Grains / தானியம்
English Tamil தமிழ்
Lemon Elumichai Palam எலுமிச்சை பழம்
Tomato Thakaali Palam தக்காளி
Apple Apple ஆப்பிள்
Orange Kamalaa Orange கமலா ஆரஞ்சு
Sweet Lime Saathukudi சாத்துக்குடி
Pine Apple Annaasi Palam அன்னாசிப்பழம்
Jack Fruit Palaa Palam பலாப்பழம்
Chikku Sappota சப்போட்டா
Black Grapes Panneer Thirachai Palam பன்னீர் திராட்சை
Green Grapes Thirachai Palam திராட்சைப்பழம்
Pomegranate Maathulam Palam மாதுளம் பழம்
Custard Apple Seetha Palam சீதாப்பழம்
Guava Koiyaa Palam கொய்யா பழம்
Banana Valai Palam வாழைப்பழம்
Green Banana Patcha Vaalaipalam பச்சைப்பழம்
Raisin Kaainda Thiraaichai காய்ந்த திராட்சை
Papayaa Pappaali பப்பாளிப்பழம்
Mango Mambalam மாம்பழம்
Pears Paerikkaai பேரிக்காய்
Dates Paeritchai Palam பேரீச்சம் பழம்
Water Melon Tharpoosani தர்பூசணி
Muskmelon Mulaam Palam முலாம் பழம்
Fig Athi Palam அத்தி பழம்
Plum Ooty apple / Plums ஊட்டி ஆப்பில் / பிளம்ஸ்
Shell Apple VilaamPalam விலாம் பழம்
English Tamil தமிழ்
Bengal gram dhal Kadalai paruppu கடலைப் பருப்பு
Black gram Vellai Mulu Ulundu முழு உளுந்து
Black pepper Milagu மிளகு
Coriander seeds Thaniyaa தனியா
Cumin seed Jeeragam கருஞ்சீரகம்
Fenu greek Vendhayam வெந்தயம்
Fennel (Cake seeds) Perunjeerakam சோம்பு
Fried Gram Pottukadalai பொட்டுக்கடலை
Gingelly (or) Seasame seeds Ellu எள்ளு
Green gram dhal Payatham paruppu பயத்தம் பருப்பு
Ground nut Verkkadalai வேர்க்கடலை
Lentil Mysore paruppu மைசூர் பருப்பு
Mustard Kadugu கடுகு
Poppy Seeds Kasa kasaa கசகசா
Red gram dal Thuvaram paruppu துவரம் பருப்பு
Tymol seeds Omam ஓமம்
Wheat Godhumai கோதுமை
Split Black Gram Vellai udaitha ulundu வெள்ளை உடைத்த உளுந்து
Moong Gram Dal Manja Pasi Parupu மஞ்சள் பாசிப் பருப்பு
Basmathi Rice Biriyani Arisi பிரியாணி அரிசி
Idly Rice Itili Arisi இட்லி அரிசி
Rice Pulungal Arici புழுங்கல் அரிசி
Raw Rice Patchai Arici பச்சரிசி
White Gingelly Seed Vella Ellu வெள்ளை எள்ளு
Black Gingely Seed Karupu Ellu கறுப்பு எள்ளு
Barley Paarlee வாற்கோதுமை
Horse Gram Kollu கொள்ளு
Dry Beans Mottchai மொச்சை
Maize Cholam சோளம்

-- ஆசியா உமர்.

படங்கள் - நன்றி கூகிள்.

சின்ன வெங்காயம் - Shallots

வாழைக்காய் -Raw Banana

கோவைக்காய் -Ivy Gourd/Tindora

பாகற்காய் -Bitter Gourd

முளைக்கீரை -Amaranth Leaves

புழுங்கலரிசி - Parboiled Rice

வேர்கடலை -Peanut

து.பருப்பு -Toor Dhal

க.பருப்பு - Channa Dhal

உ.பருப்பு -Urad Dhal

ஒமம்- Ajwain

கடலைமாவு - Besan Flour

--நன்றி மேனகா.

unripe mango-maangai

palm sugar -panagkarkandu

-நன்றி மகி.

பாசிப்பருப்பு ஜவ்வரிசி பாயாசம் - மீலாதுநபி வாழ்த்துக்கள்.

2012-02-05T07:18:00.013+04:00

வலையுலக நட்புகள் அனைவருக்கும் இனிய மீலாதுநபி வாழ்த்துக்கள்.

தேவையான பொருட்கள் ;

பாசிப்பருப்பு - 250 கிராம்

ஜவ்வரிசி - 100 கிராம்

வெல்லம் - 600 கிராம்

தேங்காய்ப் பால் - ஒரு காயில்

உருகிய நெய் - 3டேபிள்ஸ்பூன்

(உறைந்து இருந்தால் குறைத்து எடுக்கவும்)

ஏலக்காய்த் தூள் - 1 டீஸ்பூன்

முந்திரி பருப்பு - கால் கப்

உலர் திராட்சை - கால் கப்

உப்பு - 2 பின்ச்
பாசிப்பருப்பை மணம் வரும்படி வறுத்து கொள்ளவும்.

தண்ணீரில் அரைமணி நேரம் ஊற வைக்கவும்.

ஜவ்வரிசியை ஒரு 2-3 மணி நேரம் ஊற வைக்கவும் பின்பு அதனை வேக வைத்தால் 10 நிமிடத்தில் வெந்து விடும்.

வெல்லத்தை ஒரு கப் தண்ணீர் சேர்த்து காய்ச்சி கொள்ளவும்.

பாசிப்பருப்பை குக்கரில் தேவைக்கு தண்ணீர் சேர்த்து இரண்டு விசில் வைத்து அணைக்கவும்.

ஒரு பாத்திரத்தில் வெந்த பாசிப்பருப்பு, வடிகட்டிய காய்ச்சிய வெல்லம்,வெந்த ஜவ்வரிசி,தேங்காய்ப்பால்,ஏலக்காய்ப் பொடி சேர்த்து கொதிக்க வைக்கவும். உப்பு இரண்டு பின்ச் சேர்ப்பதால் இனிப்பு எடுபடும்.

கொதி வந்தவுடன் நெய்யில் முந்திரி கிஸ்மிஸ் வறுத்து சேர்க்கவும்.கலந்து விடவும்.

சுவையான பாசிப்பருப்பு ஜவ்வரிசி பாயாசம் ரெடி.

பாயாசம் ஊற்றுவது போல் கெட்டித்தனமை அவரவர் விருப்பம்.சிறிய சிறிய கப்களிலோ அல்லது டம்ளரிலோ விட்டு பரிமாறவும்.மகன் ஊரில் இருந்து வந்திருப்பதால் ஒரு சின்ன ஃபேமிலி கெட்டுகெதர் அதற்கு செய்தது.

மூன்று வருடங்களுக்கு முன்பே இந்த குறிப்பை அறுசுவையில் ஏற்கனவே சிறிய மாற்றத்துடன் பகிர்ந்து இருக்கிறேன்.

தேங்காய்ப்பாலிற்கு பதில் தேங்காயை துருவலாகவோ அல்லது நறுக்கி வறுத்தோஅல்லது பாதி காயை கொரகொரப்பாக அரைத்தோ விடலாம்.பால் எடுப்பதாய் இருந்தால் ஒரு காயில் எடுத்து சேர்க்க வேண்டும்.ஏலக்காயை முழுதாக லேசாக தட்டியும் போடலாம்.

நீங்கள் செய்யும் அளவிற்கு தகுந்தபடி பொருட்களின் அளவை பார்த்து கொள்ளவும்.

-- ஆசியா உமர்.

மை சிஸ்லர் / My Sizzler

2012-02-04T14:20:00.025+04:00

இந்த வருடம் என்னுடைய ஹெல்தி ஹேப்பி கிச்சனுக்கு வாங்கிய புதுசு இந்த சிஸ்லர்.பாத்திரங்கள் என் உபகரணங்கள் பகுதிக்கு பதிவு போட்டு நாளாகுதே.அதனால் இங்கும் பகிர்ந்தாச்சு.

என் மகனுக்கு மிக்ஸ்ட் கிரில் சிஸ்லர் மிகவும் பிடிக்கும்.நாங்க வழமையாகப் போற ரெஸ்ட்டாரண்டில் இதனை ஆர்டர் செய்து சாப்பிடுவது வழக்கம்.

சரி நாமே ஏன் முயற்சி செய்து பார்க்கக் கூடாதுன்னு செய்து பார்த்தால் பெரிய வேலையாய்ப் போச்சு.வெறும் 18 திர்ஹமிற்கு ஆர்டர் செய்து ஜாலியாக சாப்பிடுவதை விட்டு விட்டு நானே வீட்டில் செய்து தருகிறேன் என்று களத்தில் இறங்கி பெரிய மெனக்கிடல் தான். ஆனாலும் நாமே வீட்டில் செய்து கொடுப்பது பெரிய திருப்தி,சந்தோஷம் தான்.

இந்த சுவையான குறிப்பை பார்க்க இங்கு கிளிக்கவும்.

--ஆசியா உமர்.

மஷ்ரூம் குருமா/கிரேவி - Mushroom Kurma/Gravy

2012-01-30T07:38:00.013+04:00

இந்த குறிப்பை Any One Can Cook : Series 40 அனுப்புகிறேன்.

தேவையான பொருட்கள்;

பட்டன் காளான் - 200 கிராம்

வெங்காயம் - 2

தக்காளி -1

இஞ்சி பூண்டு பேஸ்ட் -1 டீஸ்பூன்

கரம் மசாலா - கால்டீஸ்பூன்

பச்சை மிளகாய் - 2

மல்லி,புதினா - சிறிது

தேங்காய் - 2 டேபிள்ஸ்பூன்

முந்திரி -4

மிளகாய்த்தூள் - அரைடீஸ்பூன்

சீரகத்தூள் - அரைடீஸ்பூன்

மல்லித்தூள் - 1 டீஸ்பூன்

மஞ்சள் தூள் - கால் டீஸ்பூன்

எண்ணெய் - 3 டேபிள்ஸ்பூன்

உப்பு - தேவைக்கு.

ஒரு வெங்காயத்தை பொடியாக நறுக்கி கொள்ளவும். மற்றொரு வெங்காயத்துடன்,தக்காளி,தேங்காய்,முந்திரி சேர்த்து நைஸாக அரைத்து எடுக்கவும்.காளானை கொதிக்கும் நீரில் போட்டு அலசி,நறுக்கி வைக்கவும்.

வாணலியில் எண்ணெய் விட்டு காயவும்,நறுக்கிய வெங்காயம் போட்டு சிவற வதக்கவும்.இஞ்சி பூண்டு பேஸ்ட் கரம் மசாலா சேர்க்கவும்,வதக்கவும்.

அத்துடன் மல்லி,புதினா,பச்சை மிளகாய் சேர்க்கவும்.சிறிது வதங்கட்டும்.

அத்துடன் நறுக்கிய காளான் சேர்க்கவும். வதக்கவும்.

காளானுடன் மல்லித்தூள்,சீரகத்தூள்,மஞ்சள் தூள், மிளகாய்த்தூள் சேர்த்து பிரட்டவும்.

சிறிது உப்பு சேர்த்து ஒரு கப் தண்ணீர் சேர்த்து கொதிக்க விடவும்.

நன்கு கொதிவந்தவுடன் அரைத்த வெங்காயம்,தக்காளி,தேங்காய்,முந்திரி விழுதை சேர்த்து தேவைக்கு தண்ணீர் சேர்க்கவும்.

கலந்து விட்டு கொதிக்க விடவும்.சிம்மில் வைத்து குருமா கொதிக்கட்டும்,நன்கு அரைத்து விட்ட தேங்காய் வாடை மடங்க வேண்டும். காளானில் ஒரு கடுப்பு இருக்கும்,அதனால் உப்பு பார்த்து சிறிது சேர்க்கவும்.காரமும் ஏற்றுக் கொள்ளாது, குறைவாக தேவைக்கு காரம் சேர்த்தால் சரியாக இருக்கும்.

சுவையான சத்தான காளான் குருமா ரெடி.

சப்பாத்தி,பரோட்டா,நாண்,ஆப்பம்,தோசை,இட்லி,சாதம் வகைகளுடனும் பரிமாறலாம். இந்த கிரேவி சிக்கன்,மட்டன் குருமா மணம் இருக்கும்.

பத்து நிமிடத்தில் சாஃப்ட் சப்பாத்தி செய்ய கால் கிலோ கோதுமை மாவோடு கைபொறுக்கும் சூட்டில் தண்ணீர், தேவைக்கு உப்பு, 2டீஸ்பூன் எண்ணெய் விட்டு பிசைந்து வைக்கவும்.பின்பு அதனை 6 உருண்டையாக உடனே உருட்டி, மாவு போட்டு சப்பாத்தியாக தேய்த்தால் சாஃப்ட் சூப்பர் சப்பாத்தி விரைவில் ரெடி.

--ஆசியா உமர்.

வலி - சிறுகதை

2012-01-25T06:27:00.011+04:00

நேசம் + யுடான்ஸ் இணைந்து வழங்கும் புற்றுநோய் விழிப்புணர்வு கதை

மழை சோவென்று பெய்து கொண்டிருந்தது..

ஏங்க, “கொஞ்சம் நில்லுங்க,இப்ப சாயா போட்டு தந்திடுவேன் “ என்று கிளம்பிய ஹைதர் சாஹிபை சத்தமிட்டு அழைத்தாள் பல்கீஸ் பெத்தா.

விறகில் தீ பிடிக்காததால் அவசரத்திற்கு காய்ந்த பீடி இலையை அடுப்பில் விறகு மேல் போட்டு, பக்கத்தில் இருந்த சிம்னி விளக்கில் தாளை பற்ற வைத்து நெருப்பு உண்டாக்கி ஊதி ஊதி அடுப்போடு போராடி ஒரு வழியாக வீடு முழுவதும் புகை முட்ட கையில் சாயா கிளாசோடு ஓடி வந்தாள், பல்கீஸ் பெத்தா.சாயா கூட குடிக்காமல் தூறிக் கொண்டிருந்த மழையை பொருட்படுத்தாது குடையை எடுத்துக் கொண்டு தன் சைக்கிள் பழுது பார்க்கும் கடையை நோக்கி விரைந்தார் ஹைதர் சாஹிபு.

இப்படி சம்பாதிக்கும் ஹைதருக்கு ஒரே ஆண் குழந்தை தான். மகன் தங்களைப்போல் கஷ்டப்படக் கூடாது, எப்படியும் படிக்க வைத்து நல்ல நிலமைக்கு கொண்டு வரவேண்டும் என்று வைராக்கியத்தோடு போராடி வெற்றியும் பெற்றனர் இருவரும்.

அவர்களின் நல்ல மனதிற்கு ஏற்றாற் போல் மகன் ஹமீதும் பெரிய படிப்பு படித்து உயர்ந்த பதவியில் இருந்து அளவிலா நிம்மதியை இருவருக்கும் தந்து விட்டிருந்தான்.

பல்கீஸ் பெத்தா,ஹைதர் சாஹிபு வசிப்பது பழைய ஓட்டு வீட்டில்,ஆனால் மகனோ மற்றொரு தெருவில் புதிய வீடு கட்டி குழந்தைகளோடு குடியேறி வசதியாக வசித்து வருகிறார்.

பல்கீஸ் பெத்தாவும், ஹைதர் சாஹிபும் வைராக்கியமாக தாங்கள் வசித்த வீட்டை விட்டு மகனோடு போகாமல் மகன் அப்ப அப்ப செலவுக்கு தரும் பணத்தை வாங்கிக் கொண்டு, பெத்தா பொழுது போக்காக பீடி சுற்றியும், ஹைதர் சாஹிபு தன் பழைய சைக்கிள் கடையையும் கவனித்து வந்த வருமானத்தில் தனியாகவே நிம்மதியாக வாழ்ந்து வந்தனர்.

பல்கீஸ் பெத்தாவிற்கு தடப் புகையிலையும், வெற்றிலையும் போடும் பழக்கம் நெடுநாட்களாக இருந்து வந்தது. ஹைதர் சாஹிபு எத்தனை எடுத்து சொல்லியும் கேட்காமல், புகையிலையை வாயில் ஒதுக்கி வைத்து கொண்டு எப்பவும் புளிச் புளிச் சென்று துப்பிக் கொண்டிருப்பாள். பக்கத்தில் துப்புகணிக்கம் வேறு அதில் துப்புவது போதாது என்று வீட்டின் முற்றத்தில், தெரு வாசலோரம் எங்கும் பெத்தாவின் வெற்றிலை துப்பானி கரை தான்.

இந்த வெற்றிலை புகையிலை போடும் பழக்கத்திற்கும் பெத்தா துப்பும் துப்பானிக்கும் அசிங்கப்பட்டே மருமகள் தனியாக போய்விட்டாள்.

கொஞ்ச நாளாய் ஆக்கிய சோறு அப்படியே பானையில் இருக்க,பெத்தா சாயா மட்டும் போட்டு குடிப்பதையும் சோற்றை தண்ணீர் ஊற்றி வாசலில் கிடாய்க்கு வைப்பதையும் ஹைதர் சாஹிபும் கவனித்து கொண்டு தான் வருகிறார்.

“ஏம்மா,பல்கீஸ் சோறு இறங்கலையா? ஏதாவது இட்லி தோசை வாங்கி வரட்டுமா “ என்றவரிடம், “ஒண்ணும் திடமானதை முழுங்க முடியலைங்க”, என்றாள்.

“சரி,வைத்தியரை கூட்டியாரேன்,கை மருந்து சொல்வாரு கேட்டு சொல்படி நட, எல்லாம் சரியாயிடும்”, என்றார்.

ஊரில் பேர் போன மஞ்சி வைத்தியரை அழைத்து வந்தார் ஹைதர் சாஹிபு.

வைத்தியரும் பெத்தாவின் வாயை திறக்க சொல்ல, பெத்தாவால் வாயைக் கூட முழுமையாக திறக்க முடியலை,கன்னத்தில் கையை வைத்துக் கொண்டு வலி உயிர் போவதாயும்,எரியுதுன்னு புலம்பிய பெத்தாவை அப்பொழுது தான் கவனித்தார் ஹைதர்,முகம் வெளிறி, தீ பட்ட மாதிரி திட்டு திட்டாய் இருப்பதையும் கண்டார்.

நல்ல கவனித்து பார்த்த வைத்தியர்,“இதை டவுணில் பெரிய டாக்டரிடம் தான் காட்டணும், நிலைமை கையை மீறி போயிட்ட மாதிரி தெரியுது சாஹிபு“ என்று சொல்லிவிட்டு கிளம்பி விட்டார்.

ஹைதர் சாஹிபிற்கு கையும் ஓடலை,காலும் ஓடலை, மகன் ஹமீதிடம் போய் விஷயத்தை சொல்ல, மகனும் எப்படியும் உம்மாவை பெரிய டாக்டரிடம் காட்டினால் குணமாகிடும் என்று தன் வாப்பாவை சமாதானப் படுத்தினார்.

சரியான எரிச்சல் ஹமீதிற்கு, எத்தனை முறை உம்மாவிடம் இந்த புகையிலை போடும் பழக்கத்தை விடு, பீடி சுற்றாதே, பீடி இலையை போட்டு அடுப்பில் எரிக்காதேன்னு சொல்லியும் கேட்காமல் இப்படி வம்பை விலைக்கு வாங்கிட்டு முழிக்கிறாங்களேன்னு வருத்தம்.

டவுண் ஆஸ்பத்திரியில் பல்கீஸ் பெத்தாவை டாக்டர் சோதனை செய்து விட்டு, ஒரு டெஸ்ட் பாக்கி விடாமல் அனைத்தையும் எடுக்க சொல்ல, ஹைதர் சாஹிபிற்கு விஷயம் ஓரளவு புரிந்தது.

மகன், பெற்றோர் இருவரையும் தங்கள் வீட்டிற்கு வரும் படி அழைக்க, மறுத்து விட்டு இருவரும் தம் வீட்டிற்கே வந்து விட்டனர்.

ஆஸ்பத்திரிக்கு காலையில் போய் மாலை திரும்பியதால் அயர்ச்சியாக இருந்தும், இரவு தூக்கம் வராமல் இருவரும் விழித்தே இருந்தனர். மனைவி ஒன்றும் சாப்பிடாமல் இருக்க ஹைதர் சாஹிபும் மட்டும், கடையில் சாயா குடித்து விட்டு வந்து படுத்து கொண்டார். முக்கி முனகி தூங்காமல் இருந்த மனைவியின் வேதனையை அவரால் தாங்க முடியவில்லை.

காலையில் எழுந்து சுபூஹு தொழுது விட்டு வந்த ஹைதர் சாஹிபு சற்றே அசந்த மனைவியின் அருகே வந்தமர்ந்தார்.கன்னத்தில் இருந்து பிசு பிசுப்பான நீர் வடிந்து கொண்டிருந்தது. இரண்டு நாளில் இத்தனை சுகவீனமா? இது என்ன முசீபத்து யா அல்லாஹ்! என்று அப்படியே மனம் பதைத்துப் போனார்,ஹைதர். அதற்குள் உதடு,நாக்கு,வாயின் உட்பகுதி எல்லாம் புண் பரவி விட்டிருந்தது.

காலையில் வந்த மகனின் முகமும் வாட்டமாக இருக்க, ரிசல்ட் வந்தவுடன் தான் ட்ரீட்மென்ட் ஆரம்பிக்க முடியும் வாப்பா, எனக்கும் ரொம்ப கவலையாயிருக்கு, ஏதோ புண்ணு பொடின்னு டாக்டர் சொல்லி, மருந்து தந்து சரியாயிடக்கூடாதான்னு இருக்கு.

ஆனால் ஆளாளுக்கு சொல்றதைப் பார்த்தால் உம்மாவிற்கு வாயில் புற்றோன்னு தோணுது, இனி என்ன செய்ய முடியும்னு பார்க்கனும் என்றார் ஹமீது.

ஹைதர் சாஹிபும், ஹமீதும் பயந்த மாதிரியே ரிசல்ட்டும் வந்தது.Mouth Cancer என்று டாக்டர் இலகுவாக சொல்ல,விஷயம் அக்கம் பக்கம் கசிந்து ஆட்கள் பார்க்க வரவும் போகவுமாக இருந்தனர்.

புற்று நோய் யாருக்கும் எந்த வயதிலும் வரலாம் உஷாராய் இருப்பது அவசியம், இந்த இளவு பிடிச்ச புற்று நோய் தன் உம்மாவுக்கு வரணுமா? தானுண்டு தன் வேலையுண்டுன்னு இருந்தவர், உருகி ஓடாய் தேய்வதை காணச் சகிக்காமல்,கவனிக்காது விட்டு விட்டேனே, என்று மனம் வருந்தினார் ஹமீது.

ஊணும் உறக்கமும் தொலைந்து பல்கீஸ் பெத்தா பார்க்கவே பரிதாபமாக ஆகிவிட்டதை கண்டு ஹைதர் சாஹிபு கடைகண்ணிக்கு கூட போகாமல் வீட்டில் மனைவி பக்கமே இருந்து வந்தார். பாங்கு சத்தம் கேட்டால் தெருவில் இருக்கும் பள்ளிக்கு மட்டும் தொழப் போய் வந்தார்.

டவுண் டாக்டரும் இனி ஒன்றும் செய்ய முடியாது, புற்று நோய் முற்றி விட்டது என்று பல்கீஸ் பெத்தாவிற்கு நாள் குறித்து விட்டார்.வேதனையுடன் மனைவி பல்கீஸ் தன்னோடு இருக்கப் போகும் நாட்களை எண்ணியபடி நேரத்தை கழித்தார்,ஹைதர் சாஹிபு.

சந்தோஷமாக வாழ்ந்த அந்த முதிய தம்பதியரின் வாழ்வில் புகையிலை என்ற கெட்ட பழக்கத்தால் பிரிவு என்ற கொடிய முடிவை அல்லாஹ் நாடிவிட்டானே!..

புற்று நோய்க்கு தீர்வு மரணம் தானா? இதனை ஆரம்பத்திலேயே கவனிக்காது விட்டது தன் தவறோ என்ற வேதனை அவரை ஆட்டி படைத்தது. நம்ம ஊரிலாவது, நாற்பது வயதை தாண்டியவர்கள் முழு உடல் பரிசோதனை செய்ய வேண்டியதின் அவசியத்தை வலியுறுத்தும் வகையில், மகனிடம் சொல்லி புற்றுநோய் விழிப்புணர்வைப் பற்றிய துண்டு பிரசுரம் ஒன்றை ஏற்பாடு செய்து, ஊர் முழுவதும் எல்லா ஜமாத்திற்கும் விநியோகிக்க வேண்டும் என்று உறுதி கொண்டார்.

மனதின் வலி சற்றே குறைந்தது ஹைதர் சாஹிபிற்கு.

குறிப்பு :-

துப்பானி – எச்சில

துப்புகணிக்கம் – எச்சில் துப்பும் சொம்பு

சுபூஹூ – அதிகாலை தொழுகை

முசீபத் – கஷ்டம், இடையூறு

ஜமாத் - கூட்டமைப்பு.

முக்கியக் குறிப்பு:

புற்று நோயை ஒழிப்போம்! புதிய உலகைப் படைப்போம்!

இந்தக் காலத்தில் புற்று நோய் யாருக்கு,எப்படி,எதுக்கு வருது என்று கணிக்க முடியவில்லை.காலம் கடந்த பின்பு கவலைப்ப்ட்டு புண்ணியமில்லை.

உணவே மருந்துன்னு சொல்வாங்க,சத்தான,தரமான ஆரோக்கியமான உணவுகளை தேர்ந்தெடுத்து சாப்பிடனும், உடலில் ஏதாவது சிறுமாற்றம், கட்டி, வீக்கம், வலி, உடல் நலக் குறைவு என்று வந்தால் உடனே நல்ல அனுபவமுள்ள மருத்துவரின் ஆலோசனை, மருத்துவத்தை கடைப்பிடிப்பது அவசியம் என்பதையும் தெரிவித்து கொள்கிறேன்.

--ஆசியா உமர்.

மட்டன் ஓட்ஸ் கட்லெட் / Mutton Oats Cutlet

2012-01-22T13:41:00.013+04:00

தேவையான பொருட்கள்:

எலும்பில்லாத மட்டன் - கால் கிலோ

இஞ்சிபூண்டு பேஸ்ட் - 2டீஸ்பூன்

கரம் மசாலா - கால்டீஸ்பூன்

தயிர் - 1டேபிள்ஸ்பூன்

சில்லி பவுடர் - 1 டீஸ்பூன்

மஞ்சள் தூள் - கால்டீஸ்பூன்

மிள்கு,சீரகம்,சோம்பு பவுடர் - தலா கால்டீஸ்பூன்

வறுத்து பொடித்த ஓட்ஸ் - 3டேபிள்ஸ்பூன்

முட்டை - 1

வெங்காயம் - 100 கிராம்

பச்சை மிளகாய் - 2

மல்லி,புதினா - சிறிது

எண்ணெய் ,உப்பு - தேவைக்கு.

எலும்பில்லாத மட்டன் துண்டுகளை நன்கு கழுவி சுத்தம் செய்து தண்ணீர் வடிகட்டி,2டீஸ்பூன் இஞ்சிபூண்டு பேஸ்ட்,சில்லி பவுடர் 1டீஸ்பூன்,தயிர் - 1டேபிள்ஸ்பூன்,தேவைக்கு உப்பு சேர்க்கவும்.அத்துடன் கரம் மசாலா,மஞ்சள் தூள், மிளகு,சீரக,சோம்பு தூள் அனைத்தும் தலா கால்ஸ்பூன் சேர்த்து கலந்து பிரட்டி வைக்கவும்.

மசாலா கலந்த மட்டனை குக்கரில் வைத்து தண்ணீர் சேர்க்காமல் நான்கு விசில் வைத்து எடுக்கவும்.வெந்த மட்டனில் தண்ணீர் ஊறி நிற்கும். இப்படி கறி சுருள வற்ற வைக்கவும்.

மிக்ஸியில் போட்டு அரைத்து எடுக்கவும்.

அரைத்த மட்டனுடன், லேசாக வறுத்து பொடித்த ஓட்ஸ் - 3டேபிள்ஸ்பூன்,முட்டை -1 ,அரைத்த வெங்காயம்,பச்சை மிளகாய்,மல்லி,புதினா விழுது சேர்க்கவும்.
எல்லாம் கலந்தால் கெட்டியாக இருக்கும். உப்பு சரி பார்க்கவும்.

விரும்பிய வண்ணம் கட்லட்டை சேப் செய்து கொள்ளவும்.

கடாயில் எண்ணெய் விட்டு காயவும், ரெடி செய்த கட்லட்டை போட்டு மிதமான தீயில் சிவற பொரித்து எடுக்கவும்.

பொரித்து எடுத்த கட்லெட்டை டிஸ்யூ பேப்பரில் வைத்து எடுக்கவும்.

சுவையான மட்டன் ஓட்ஸ் கட்லெட் ரெடி.

இதனை ஸ்நாக்ஸாகவும்,பார்ட்டியில் ஸ்டார்டராக விரும்பிய சாஸ் வகையுடன் பரிமாறலாம். அல்லது ஃப்ரைட் ரைஸ்,பிரியாணி,வெரைட்டி ரைஸ், ப்லைன் ரைஸ்,தால்,ரசம் உடனும் பரிமாறலாம்.

எப்பவும் கறிவடை,கட்லெட் செய்யும் பொழுது பொட்டுக்கடலை மாவு ,முட்டை சேர்ப்பது வழக்கம்,ஓட்ஸ் சேர்த்து பார்த்தேன்,கட்லெட் சூப்பராக எண்ணெய் குடிக்காமல் வந்தது. ஓட்ஸ் டேஸ்ட் பிடிப்பவர்கள் செய்து பாருங்க.

---ஆசியா உமர்.

சிக்கன் முள்ளங்கி தாள்ச்சா - Chicken Raddish Thalcha

2012-01-18T07:57:00.011+04:00

தேவையான பொருட்கள்:

முள்ளங்கி - கால் கிலோ

பருப்பு - 100 கிராம்

எலும்பு சிக்கன் துண்டு - கால் கிலோ

தக்காளி - 100கிராம்

வெங்காயம் - 100கிராம்

பச்சை மிளகாய் - 1

மல்லி,புதினா கருவேப்பிலை - சிறிது

இஞ்சி பூண்டு பேஸ்ட் - 2டீஸ்பூன்

மஞ்சள் தூள் - கால்டீஸ்பூன்

கரம் மசாலா - கால் டீஸ்பூன்

கறி மசாலாத்தூள் அல்லது கலந்த மிளகாய்த்தூள்- 2 டீஸ்பூன்

எண்ணெய் - 4 டீஸ்பூன்

கடுகு,உளுத்தம் பருப்பு - 1டீஸ்பூன்

மிளகாய் வற்றல் - 2

உப்பு - தேவைக்கு.
தேவையான பொருட்களை எடுத்துக் கொள்ளவும்.நறுக்கி ரெடி செய்து கொள்ளவும்.

ஊறிய பருப்பை தேவைக்கு தண்ணீர் சேர்த்து கால் டீஸ்பூன் மஞ்சள் தூள் சேர்த்து 2-3 விசில் குக்கரில் வைத்து எடுக்கவும்.

முக்கால் பததில் வெந்த பருப்போடு,சிக்கன் துண்டுகள், நறுக்கிய வெங்காயத்தில் பாதி,தக்காளி,பச்சை மிளகாய்,நறுக்கிய மல்லி புதினா சிறிது, இஞ்சி பூண்டு பேஸ்ட்,கரம் மசாலா,கறிமசாலா தேவைக்கு சிறிது தண்ணீர் உப்பு சேர்த்து வதக்கவும்.

கலந்து விட்டு குக்கரை மூடி வெயிட் போட்டு ஒரு விசில் வரவும் அடுப்பை அணைக்கவும்.
வெந்த சிக்கன் முள்ளங்கி தால்ச்சா இப்படி இருக்கும்.உப்பு சரி பார்க்கவும்.

ஒரு வாணலியில் எண்ணெய் விட்டு கடுகு,உளுத்தம் பருப்பு,மிளகாய் வற்றல்,கருவேப்பிலை போட்டு தாளித்து மீதி வெங்காயத்தை போட்டு வதக்கவும்.இளஞ்சிவப்பாக வெங்காயம் சிவந்ததும் ரெடியான தாள்ச்சாவில் சேர்த்து கலந்து விடவும்.

சுவையான சிக்கன் முள்ளங்கி தாள்ச்சா ரெடி.

இதனை ப்லைன் சாதம்,கீரைஸ்,தேங்காய்ச் சோறு

பிரியாணி,சப்பாத்தி,ஆப்பம்,இட்லி,தோசை எதற்கும் தொட்டு சாப்பிடலாம்.

பொதுவாக மட்டன்,கத்திரிக்காய் அல்லது வெறும் கத்திரிக்காய் போட்டு தாள்ச்சா செய்வோம்.நான் சிக்கன்,முள்ளங்கி போட்டு செய்திருக்கிறேன்.இதே முறையில் சிக்கனோடு கத்திரிக்காய் சேர்த்தும் செய்யலாம்.கத்திரிக்காய் சேர்த்து செய்தால் சிறிது புளி கரைத்து சேர்க்கவும்.

-ஆசியா உமர்.

பொங்கலோ பொங்கல் !

2012-01-14T22:10:00.005+04:00

அன்பான நட்புள்ளங்கள் அனைவருக்கும் இனிய பொங்கல் நல்வாழ்த்துக்கள்.

என்னுடைய பொங்கல் பகிர்வுகளை கிளிக் செய்து பார்க்கவும்.

சர்க்கரைப் பொங்கல்/ வெண் பொங்கல்

கோதுமைப் பொங்கல்

பொங்கல் காய்கறிக் கூட்டு

பொங்கல் சிறப்பு நினைவலைகள்

--ஆசியா உமர்.

மாசித் துவையல்

2012-01-13T09:12:00.013+04:00

தேவையான பொருட்கள்:

மாசி - சிறிய துண்டு

மிளகாய் வற்றல் - 3

சின்ன வெங்காயம் - 4

அல்லது பெரிய வெங்காயம் -பாதி

புளி - புளியங்கொட்டை அளவு

தேங்காய் துருவல் - 3 டேபிள்ஸ்பூன்

உப்பு - தேவைக்கு.

மாசி மற்றும் மிளகாய் வற்றலை எடுத்துக் கொள்ளவும்.மாசியை சிறிது தூளாக உடைத்து கொள்ளவும்.

பின்பு மிக்ஸியில் போட்டு மிளகாய் வற்றல்,உப்பு சேர்த்து பொடி செய்து கொள்ளவும்.மூன்று டீஸ்பூன் மாசித்தூளை எடுத்துக் கொள்ளவும்.

மாசித்தூள்,தேங்காய் துருவல், உப்பு,புளி,வெங்காயம் எடுத்து கொள்ளவும்.

மிக்ஸி சிறிய ஜாரில் மேற்சொன்ன பொருட்களை போட்டு துவையல் பதத்திற்கு அரைத்துக் கொள்ளவும்.காரம் தேவைப்படுவோர் ஒரு வற்றல் சேர்த்து அரைத்துக் கொள்ளலாம்.

சுவையான மாசித்துவையல் ரெடி.

இதனை ப்லைன் சாதம் ரசம் அப்பளத்துடன் சாப்பிட சூப்பராக இருக்கும். கொஞ்சம் சாதம் வழக்கத்தை விட அதிகம் வடித்து கொள்ளுங்கள். மாசியை பொதுவாக சம்பல் செய்வது வழக்கம்.மாசித்துவையல், சம்பல், சாதம் தவிர அரிசி மாவு ரொட்டிக்கு சூப்பர் காம்பினேஷன்.

மாசிச் சம்பல் குறிப்பை பார்க்க இங்கு கிளிக்கவும்.

--ஆசியா உமர்.

மை ஹெல்தி ஹேப்பி கிச்சன்/ My Healthy Happy Kitchen

2012-01-11T19:07:00.003+04:00

அன்பான வலைப்பூ நட்புள்ளங்களுக்கு,

நீண்ட நாட்களாக ஆங்கிலத்தில் ஒரு சமையல் வலைப்பூ ஆரம்பிக்க வேண்டும் என்ற ஆர்வம் இன்று நிறைவேறியது. உங்களுடைய வருகையையும் ஒத்துழைப்பையும் ஆவலுடன் எதிர்பார்க்கிறேன்.என்னுடைய கேரள, கன்னட, தெலுங்கு மற்றும் வடநாட்டு தோழிகளும் என் சமையற் குறிப்புக்களை ரசிக்க ருசிக்க வேண்டும் என்ற விருப்பமும் நிறைவேறியதில் எனக்கு மகிழ்ச்சி.

நான் இனி முயற்சி செய்யும் புதிய குறிப்புக்கள் அங்கும் இடம் பெறும்.

என்றென்றும் அன்புடன்,

--ஆசியா உமர்.

நேந்திரங்காய் சிப்ஸ்

2012-01-09T07:03:00.013+04:00

தேவையான பொருட்கள்:

நேந்திரன் வாழைக்காய் - 2

எண்ணெய் - கால் லிட்டர்

மஞ்ச்ள் தூள் - கால் டீஸ்பூன்

உப்பு - அரை டீஸ்பூன்

நேந்திரம் பழமாக எடுக்கக் கூடாது. காய்வெட்டாக இருக்க வேண்டும்.தோல் சீவி இப்படி மெல்லியதாக சீவிக் கொள்ளவும்.

விரும்பினால் மஞ்சப் பொடி,உப்பு இப்படி சிறிது தண்ணீரில் கரைத்து வைக்கவும்.

தேங்காய் எண்ணெய் (edible coconut oil) மட்டும் கூட உபயோகிக்கலாம்.நான் இங்கு தேங்காய் எண்ணெய் + சன்பிளவர் ஆயில் கலந்து உபயோகித்துள்ளேன்.வாணலியில் எண்ணெய் விட்டு காயவும் சீவி வைத்த நேந்திரங்காயை கொஞ்சம் கொஞ்சமாக போடவும்.போட்டவுடன் எண்ணெய் வெள்ளை நிறமாக நுரையோடு பொங்கும் பயப்படாமல் கண் அகப்பை கொண்டு பிரட்டி பிரட்டி விடவும்.சீவிய காய் ஒன்றோடு ஒன்று ஒட்டாமல் பார்த்துக் கொள்ள வேண்டும்.முடியுமானால் காயை எண்ணெயிலேயே நேரடியாக சீவினால் சூப்பராக வரும். எண்ணெயில் போட்ட சிப்ஸ் க்லகலன்னு பொரிந்து வரும் .

சிப்ஸ் பொரிந்து வரும் பொழுது மஞ்ச்ள் உப்பு நீரை சிறிது தெளிக்கவும். மஞ்ச்ள் உப்பு நீர் தெளிக்க பிரியப்படாதவர்கள் வெறும் உப்பை தேவைக்கு எண்ணெயில் சிறிது போட்டு விடலாம்.சிப்ஸில் உப்பு பிடித்து விடும்.

சிப்ஸ் பொரிந்து இப்படி பிரட்டும் பொழுது ஒன்றோடு ஒன்று ஒட்டாமல் கலகலன்னு இருக்கும்.

ஆஹா மணக்க மண்க்க நேந்திரம் சிப்ஸ் ரெடியாயிடுச்சு.

பொரிந்த சிப்ஸை எண்ணெய் வடிகட்டி எடுத்து வைக்கவும்.

சுவையான நேந்திரங்காய் சிப்ஸ் ரெடி.

என்னாலேயே நம்ப முடியலை,அப்படியே கடையில் வாங்குவது போலவே இருந்தது.ஆறியவுடன் எடுத்து பாட்டிலில் போட்டு மூடி வைத்து தேவைக்கு எடுத்து சாப்பிடலாம்.

-ஆசியா உமர்.

சர்க்கரைப் பொங்கல்/ வெண் பொங்கல்

2012-01-04T08:08:00.027+04:00

சர்க்கரைப் பொங்கல் :

தேவையான பொருட்கள்;

பச்சரிசி - 1 கப்

பாசிப்பருப்பு - கால் கப்

கடலை பருப்பு - 2டேபிள்ஸ்பூன்

பால் - ஒரு கப்

அச்சு வெல்லம் - 350கிராம்

நெய் - ஒரு குழிக்கரண்டி

ஏலக்காய் - 5

முந்திரி - 15

திராட்சை - 20

தேவையான பொருட்களை எடுத்து கொள்ளவும். பாசிப்பருப்பை மணம் வர வறுத்து கொள்ளவும்.

வெல்லத்துடன் ஒரு கப் தண்ணீர் சேர்த்து ஏலக்காயை தட்டி போட்டு பாகு எடுக்கவும்.

குத்து மதிப்பாக மூன்று பெரிய அச்சு வெல்லம் சேர்த்தேன்.இனிப்பு சரியாக இருந்தது.

ஏலக்காயை இப்படி வெல்லத்தில் தட்டி போட்டு வடிகட்டி விடுவதால் வாயில் அகப்படாது.

குக்கரில் ஒரு கப் பால் நான்கு கப் தண்ணீர், ஊறிய பச்சரிசி,வறுத்த பாசிப்பருப்பு,கடலை பருப்பு சேர்த்து வேகவைக்கவும். கொதிவந்தவுடன் அடுப்பை குறைத்து வெயிட் போட்டு மூன்று நான்கு விசில் வைத்து எடுத்து, ஆவி அடங்கியவுடன் மசித்து விடவும்.அரிசியின் தரத்தை பொறுத்து தண்ணீர் அளவு மாறுபடும். புது அரிசி என்றால் தண்ணீர் அளவு குறைத்து கொள்ளவும்.

சர்க்கரைப்பாகை வடிகட்டி மசித்த பொங்கலுடன் சேர்க்கவும்.

நன்கு கலந்து விடவும்.சர்க்கரை அவரவர் ருசிக்கு கூடகுறைய சேர்க்கலாம்.

நெய் தாளிப்பு கரண்டியில் விட்டு முந்திரி திராட்சையை பக்குவமாக வறுத்து ரெடியான சர்க்கரைப் பொங்கலில் கொட்டவும்.

கலந்து பரிமாறவும்.
சுவையான தித்திப்பான சர்க்கரைப் பொங்கல் ரெடி.

இப்படி தாங்க நான் செய்வேன்.கடலைப்பருப்பு மசியாமல் தூரத்திற்கு ஒன்று பார்க்க அழகாய் ருசியாய் இருக்கும்.

வெண்பொங்கல்

தேவையான பொருட்கள்;

பச்சரிசி- கால் கிலோ

பாசிப்பருப்பு - 100கிராம்

நெய் - ஒரு குழிக்கரண்டி

முழு மிளகு - 1டீஸ்பூன்

முழு சீரகம் - அரை டீஸ்பூன்

இஞ்சி துருவல் - 1டீஸ்பூன் (விரும்பினால்)

முந்திரி - 10-15

கருவேப்பிலை - 2இணுக்கு

உப்பு - தேவைக்கு.

பச்சரிசி பாசிப்பருப்பை ஊற வைக்கவும்.

குக்கரில் அரிசியின் அளவிற்கு ஐந்து மடங்கு தண்ணீர் வைத்து,அரிசி,பாசிப்பருப்பு,இஞ்சி துருவல்(விரும்பினால்) சேர்த்து வேக வைக்கவும்.நான்கு விசில் விடவும்.

குக்கர் ஆவியடங்கி இப்படி வெந்தவுடன் தேவைக்கு உப்பு சேர்த்து அகப்பையால் மசித்து விடவும்.

தாளிப்பு கரண்டியில் நெய் விட்டு காயவும், மிளகு. சீரகம்,முந்திரி,கருவேப்பிலை தாளித்து கொட்டவும்.நெய் தாராளமாக சேர்க்கலாம்.மிளகு சீரகம் அவரவர் விருப்பம்,அதிகம் சேர்க்க விரும்பினால் சிறிது கூட்டி கொள்ளலாம்.

சுடச் சுட சுவையான பொங்கல் ரெடி. தேங்காய் சட்னி,சாம்பார்,உளுந்து வடையுடன் பரிமாற செமையாக இருக்கும்.

பொங்கல் எப்பவாவது தான் செய்வதுண்டு, அப்படியே ஹோட்டலில் போய் சுடச்சுட பொங்கல் வடை சாப்பிடப் பிடிக்கும். எங்க வீட்டில் வெண் பொங்கல் ரொம்பவும் இஷ்டம்.

--ஆசியா உமர்.

இந்த குறிப்புக்களை மங்கையர் உலகம் -ஜனவரி மாதப் போட்டி-தமிழ் நாட்டு பாரம்பரிய உணவுகள் என்ற தலைப்பிற்கு அனுப்புகிறேன்.பொங்கல் சமயம் என்பதால் இந்தக் குறிப்பு.

புத்தாண்டு நல்வாழ்த்துக்கள் - 2012

2012-01-01T10:35:00.004+04:00

சென்ற வருடம் நன்றே கழிந்தது. நிகழ்வுகள் நினைவுகள் மனதிலே.

ஒவ்வொரு வருடம் பிறக்கும் பொழுதும் அனுபவத்தால் புத்துணர்ச்சி பெறுகிறோம்.புதிய உலகத்தை காணத் தயாராகிறோம்.

வழக்கம் போல் இந்த வருடமும் புத்தாண்டு உறுதி மொழி.

மனதில் உறுதி,தெளிவு,பொறுமை வேண்டும்.

தேடல் என்பது மனித இயல்பு. அம்முயற்சி தொடரட்டும்.

கனவுகளும் கற்பனைகளும் உள்ள போதும், பெறுவதைக்கொண்டு மனநிறைவு அடைவது இறைமை.

நாம் அனைவரும் வரும் நிகழ்வுகளை எதிர் கொள்ள தயாராகுவோம்!

இனிய புத்தாண்டு நல்வாழ்த்துக்கள்.

--ஆசியா உமர்.

சிக்கன் ஸ்ட்ரைப்ஸ் / Chicken Stripes

2011-12-29T07:24:00.015+04:00

தேவையான பொருட்கள்:

சிக்கன் ப்ரெஸ்ட் - 300கிராம்

knorrஆல் இன் ஒன் பேக் அல்லது சிக்கன் 65 மசாலா - 1டீஸ்பூன்

கார்ன் ப்லேக்ஸ் - 1 கப்

கார்ன் ஃப்லோர் அல்லது மைதா- அரை கப்

முட்டை வெள்ளைக்கரு - 1

எண்ணெய் - தேவைக்கு

உப்பு- தேவைக்கு
சுத்தம் செய்து தண்ணீரில் அலசி வடிகட்டிய சிக்கன் ப்ரெஸ்ட்டை இப்படி நீளவாக்கில் துண்டுகளாக கட் செய்து கொள்ளவும்.

அதனோடு ஆல் இன் ஒன் மசாலா பேக் அல்லது விருப்பமான சிக்கன் மசாலாவுடன் உப்பு சேர்த்து கலந்து ஊற வைக்கவும்.துண்டுகள் மெல்லியதாக இருக்க வேண்டும்.மசாலாவில் உப்பு இருக்கும்.உப்பு பார்த்து சேர்க்கவும்.நன்கு ஊற வேண்டியது அவசியம்.

கார்ன் ஃப்லோர்அல்லது மைதா,பொடித்த கார்ன் ஃப்லேக்ஸ்,முட்டை வெள்ளைக்கரு ரெடி செய்து கொள்ளவும்.
சிக்கன் ஸ்ட்ரைப்ஸ் நல்ல காரமாக வேண்டுமானால் இப்படி சிக்கன் 65 மசாலா சேர்த்தும் கலந்து வைக்கலாம்.விரும்பினால் சிக்கன் துண்டுகளை பாதி வேக்காடு வெந்தும் பின் வருமாறு ரெடி செய்யலாம்.ஒரு பேனில் போட்டு சிக்கனில் ஊறும் தண்ணீரிலேயே வேக வைத்து ஆற வைத்து செய்யலாம்.

ரெடி செய்த சிக்கன் ஸ்ட்ரைப்ஸை மைதா அல்லது கார்ன்ஃப்லோரில் பிரட்டி எடுக்கவும்.

பின்பு கார்ன் ஃப்லோரில் பிரட்டிய சிக்கனை முட்டை வெள்ளைக்கருவில் டிப் செய்து எடுக்கவும்.

நொறுக்கிய அல்லது மிக்ஸியில் பொடித்து எடுத்த கார்ன் ப்லேக்ஸில் பிரட்டி எடுக்கவும்.இப்படியே அனைத்து சிக்கன் துண்டுகளையும் ரெடி செய்து கொள்ளவும்.கார்ன் ஃப்லேக்ஸை மிக்ஸியில் கரகரப்பாக ப்ரெட் கிரம்ஸ் போல் பொடித்தும் உபயோகிக்கலாம்.

கடாயில் எண்ணெய் விட்டு நன்கு சூடானவுடன் சிக்கன் ஸ்டரைப்ஸ் போட்டு நெருப்பை மீடியமாக வைத்து பொன்னிறமாக பொரித்து எடுக்கவும்.

சுவையான கிரிஸ்பியான சிக்கன் ஸ்ட்ரைப்ஸ் ரெடி.

இதனை ப்ரெட் டோஸ்ட்,டொமட்டோ சாஸ், ஃபிங்கர் சிப்ஸ்,சாலட்ஸ் உடன் பரிமாறவும்.குட்டீஸ்க்கு கொண்டாட்டமாக இருக்கும்.

பார்ட்டியில் ஸ்டார்டர்ஸ் ஆகவும் பரிமாறலாம்.ரெடிமேட் சிக்கன் நக்கட்ஸ்,ஸ்ட்ரைப்ஸ் தவிர்ப்பது நல்லது.

--ஆசியா உமர்.

வாழைக்காய் வறுவல்

2011-12-27T07:08:00.013+04:00

தேவையான பொருட்கள்:

வாழைக்காய் - 2 ( பெரியதாக)

மிளகாய்த்தூள் - 1டீஸ்பூன்

மஞ்சள் தூள் - கால்டீஸ்பூன்

சோம்புத்தூள் - அரைடீஸ்பூன்

இஞ்சி பூண்டு பேஸ்ட் - 1டீஸ்பூன்

எண்ணெய் - 2 டேபிள்ஸ்பூன்

உப்பு - தேவைக்கு
காம்புப்பகுதியையும், விளிம்புப்பகுதியையும் நறுக்கி கொள்ளவும்.

இப்படி தோல் சீவி எடுத்துக் கொள்ளவும்.

வட்டவடிவமாக நறுக்கி கொள்ளவும்.ரொம்ப மெல்லியதாக இல்லாமல் நடுத்தரமாக நறுக்கி கொள்ளவும்.அதனோடு மிளகாய்த்தூள், மஞ்சள் தூள்,சோம்புத்தூள்,இஞ்சி பூண்டு விழுது, உப்பு,ஒரு டீஸ்பூன் எண்ணெய் கலந்து பிசறி ஒரு அரை மணி நேரமாவது வைக்கவும்.

நான்ஸ்டிக் கடாயில் எண்ணெய் விட்டு காயவும் ரெடி செய்த வாழைக்காயை போட்டு பிரட்டி வேக விடவும்.சிறிது வெந்தவுடன் தண்ணீர் தெளித்து மூடி போட்டு வேக விடவும்.திரும்ப ஒரு முறை தண்ணீர் தெளித்து பிரட்டி வேக விடவும்.

இந்த வறுவல் சாஃப்டாக இருக்கும்.

நன்கு வெந்தவுடன் அடுப்பை அணைக்கவும்.

சுவையான வாழைக்காய் வறுவல் ரெடி.

சோம்பு,இஞ்சி பூண்டு சேர்ப்பதால் வயிற்றை தொந்திரவு செய்யாது. இதனை சாம்பார்,ரசம்,தயிர் மற்றும் எல்லாவகையான குழம்பு சாதத்திற்கும் வெரைட்டி ரைஸிற்கும் தொட்டுக் கொள்ள அருமையாக இருக்கும்.எண்ணெயும் குறைவாகவே உபயோகிப்பதால் சூப்பராக இருக்கும்.

--ஆசியா உமர்.

கிறிஸ்துமஸ் நல்வாழ்த்துக்கள்.

2011-12-25T19:32:00.008+04:00

உலகெங்கும் கிறிஸ்துமஸ் கொண்டாடும் என் இனிய அன்பான நட்புள்ளங்களுக்கு கிறிஸ்துமஸ் நல்வாழ்த்துக்கள்.

என் கணவரின் நண்பர் ,அவரின் மனைவி எனது இனிய தோழி அவர்கள் வீட்டில் எங்களுக்கு கிறிஸ்துமஸ் விருந்து.மிகச் சுவையான அருமையான விருந்து.அதனை உங்களோடு பகிர்ந்து கொள்வதில் எனக்கு மிகுந்த மகிழ்ச்சி.ஆசியாமா நீங்க கெஸ்ட் இல்லை,ஹோஸ்ட் சீக்கிரமே வந்திடுங்கன்னு அன்பா அழைச்சாங்க.அல் ஐனில் இருந்து அபுதாபிக்கு கிளம்பி சென்று வந்தது ரொம்ப சந்தோஷமாக இருந்தது. ரொம்ப ரிலாக்ஸ்டான அன்பான விருந்து. நல்லதொரு ஃபேமிலி கெட்டுகெதர். அனைவரும் மனம்விட்டு பேசி,சிரித்து மகிழ்ந்தது ஒரு நல்ல அனுபவம்.

விருந்தின் சூப்பர்மெனு

அரபிக் மந்தி லஹம், வெஜ் ஃப்ரைட் ரைஸ்,வெஜ் நூடுல்ஸ்,சிக்கன் லாலி பாப்,வெஜ் ஸ்பிரிங் ரோல்ஸ்,சப்பாத்தி,பரோட்டா,மலாய் கோஃப்தா,காளிப்ளவர் ட்ரை மஞ்சூரியன்,தால் ஃப்ரை,தயிர் சாதம்,இறால் கிரேவி, ஹமூர் ஃபிஷ் ஃப்ரை,வெஜ் சாலட்,ஃப்ரூட் சாலட்,குலோப் ஜாமுன் என்று ஏகப்பட்ட ரெசிப்பி.

கிறிஸ்துமஸ் என்றால் கேக் நிச்சயம் இருக்கும், ஆனால் இங்கு அரபிக்ஸ்டைலில் முழு ஆட்டையையே ஆட்டை போட்ட அருமையான பிரியாணி. கேக் கட் செய்து சாப்பிடுவது போல் ஆளாளுக்கு சாஃப்டான கறியோடு ரைஸ் சாப்பிட செம டேஸ்ட். இன்னமும் சுடச்சுட அதன் சுவை மனதிலும் நாவிலும் இருக்கு.

தொடர்ந்து பிறக்கப் போகும் இனிய புத்தாண்டு அனைவருக்கும் சிறப்பாக அமைய நல்வாழ்த்துக்கள்.

--ஆசியா உமர்..

சிக்கன் நக்கட்ஸ் /Chicken Nuggets (baked & fried)

2011-12-23T10:18:00.017+04:00

தேவையான பொருட்கள்;

டெண்டர் சிக்கன் ப்ரெஸ்ட் - 300கிராம்

இஞ்சி பூண்டு பேஸ்ட் - 1டீஸ்பூன்

சில்லி பவுடர் - அரைடீஸ்பூன்

பெப்பர் பவுடர் - கால்டீஸ்பூன்

மஞ்ச்ள் தூள் - 2 பின்ச்

கெட்டி தயிர் - 1டீஸ்பூன்

ப்ரெட் கிரம்ப்ஸ் - ஒரு கப்

மைதா மாவு - 2டேபிள்ஸ்பூன் (விரும்பினால்)

முட்டை - 1

உப்பு - தேவைக்கு

எண்ணெய் - தேவைக்கு.

நன்கு சுத்தம் செய்த எலும்பில்லாத சிக்கன் துண்டுகளை சிறிய சதுர மெல்லிய துண்டுளாக கட் செய்து அலசி தண்ணீர் வடித்து கொள்ளவும்.

துண்டு செய்த ஒரு டெண்டர் சிக்கன் ப்ரெஸ்டோடு இஞ்சி பூண்டு பேஸ்ட்,சில்லி பவுடர்,மஞ்சள் தூள், மிளகுத்தூள்,தயிர்,உப்பு சேர்த்து கலந்து நன்கு ஒரு மணி நேரமாவது ஊறவைக்கவும்.மசாலாவை உங்க டேஸ்ட்க்கு அட்ஜஸ்ட் செய்து கொள்ளவும்.எதுவும் சிறிய சிரத்தையோடு செய்தால் அருமையாக வரும்.

முட்டை தனியாக கலந்து ஒரு பவுலில் வைக்கவும். ப்ரெட் கிரம்ஸ் ,மைதா,சிறிது உப்பு கலந்து ஒரு ப்லேட்டில் வைக்கவும்.

ஊறிய சிக்கன் துண்டுகளை கலக்கிய முட்டையில் டிப் செய்து, ப்ரெட் கிரம்ஸில் பிரட்டி எடுத்து ஃப்ரிட்ஜ் சில்லரில் அரை மணி நேரம் வைக்கவும்.நன்கு செட் ஆகிவிடும்.
பின்பு ஒரு தவாவில் எண்ணெய் நன்கு காய்ந்த பின்பு ரெடி செய்த நக்கட்ஸ் போட்டு நெருப்பை மீடியமாக குறைத்து அருகில் நின்று பொன்னிறமாக பொரித்து எடுக்கவும்.
குட்டீஸ்க்கு இப்படி ஃப்ரை செய்து கொடுக்கவும். சுவையான சிக்கன் நக்கட்ஸ் ரெடி.சிக்கன் பேஸ்ட் எல்லாம் செய்யாமல் சிக்கன் பொரிப்பது போலவே செய்து இருந்தாலும் நக்கட்ஸ் டேஸ்ட் சூப்பராக , வெளியே கிரிஸ்பியாக உள்ளே ஜூஸியாக இருந்தது.ரெடிமேட் அயிட்டங்களை தவிர்ப்பது நல்லது.

சுவையான சிக்கன் நக்கட்ஸ் ரெடி.

விரும்பினால் முற்சூடு செய்த எலெக்ட்ரிக் ஓவனில் 200 டிகிரி செட் செய்து இரண்டு பக்கமும் ப்லேம் செட் செய்து எண்ணெய் தடவிய அலுமியம் ஃபாயில் விரித்த ட்ரேயில் 20 நிமிடம் பேக் செய்து எடுக்கலாம்.ஒரு பக்கம் சிவந்தவுடன் மறுபக்கம் திருப்பி வைக்கவும்.பேக்கானவுடன் எடுத்து பரிமாறவும்.

இநத ஹெல்தியான பேக்ட் சிக்கன் நக்கட்ஸ் நமக்கு.

--ஆசியா உமர்.

வெஜ் குருமா

2011-12-14T06:49:00.015+04:00

சப்பாத்திக்கு வெஜ் குருமா இதை எதாலும் அடிச்சிக்க முடியாது.என் மெனுவில் மாதம் ஒரு முறை வெஜ் குருமா உண்டு,ஒவ்வொரு முறையும் ஒரு விதமாக செய்வேன்.ரொம்ப கவனம் எடுத்துக்காமல் செய்த குருமா இது.நீங்களும் செய்து பாருங்க.

தேவையான பொருட்கள்;

கேரட் - 1

உருளைக்கிழங்கு - 1

பச்சை பட்டாணி - ஒரு கையளவு

பச்சை மிள்காய் - 3

வெங்காயம் - 1

தக்காளி - 1

மல்லி புதினா - சிறிது

எண்ணெய் - 2டேபிள்ஸ்பூன்

சோம்பு - அரைடீஸ்பூன்

பட்டை - சிறிய துண்டு 2

இஞ்சி பூண்டு பேஸ்ட் - 2டீஸ்பூன்

சீரகத்தூள் - 1 டீஸ்பூன்

மல்லித்தூள் - 2டீஸ்பூன்

தேங்காய் - 3 டேபிள்ஸ்பூன்

முந்திரி - 4

உப்பு - தேவைக்கு.

வெங்காயம்,தக்காளி,கேரட்,உருளை,மல்லி புதினா நறுக்கி கொள்ளவும்.தேங்காய் முந்திரி பருப்பு அரைத்து கொள்ளவும்.

ப்ரஷர் பேனில் எண்ணெய் விட்டு காய்ந்ததும் பட்டை சோம்பு போடவும்.

நறுக்கிய வெங்காயம் போடவும், வதங்கியதும் இஞ்சி பூண்டு பேஸ்ட் போடவும்.வெங்காயம் சிவற வேண்டாம். நன்கு வதக்கவும்.

நறுக்கிய மல்லி புதினா,தக்காளி சிறிது உப்பு சேர்த்து வதக்கவும்.

நறுக்கிய காய்கறிகளை சேர்க்கவும்.பிரட்டி விடவும்.

கீறிய பச்சை மிள்காய், மல்லி சீரகதூள்களை சேர்க்கவும். பிரட்டி விடவும்.

தேவைக்கு காய் மூழ்கும் அளவு தண்ணீர் சேர்க்கவும்.உப்பு சரி பார்க்கவும்.

ப்ரஷர் பேனை மூடி இரண்டு விசில் வரட்டும்.அடுப்பை அணைக்கவும்.

ஆவி அடங்கியபின் திறந்து அரைத்த தேங்காய் முந்திரி பேஸ்ட்டை சேர்க்கவும்.

நன்கு கொதித்து தேங்காய் வாடை அடங்கட்டும். அடுப்பை சிம்மில் வைத்து அணைக்கவும்.

சுவையான வெஜ் குருமா ரெடி.

சப்பாத்தியுடன் பரிமாறவும்.ஏன் இட்லி,தோசை,ஆப்பம்,பரோட்டா,நாண்,கீ ரைஸ் உடன் கூட பரிமாறலாம்.இதில் மஞ்சள்,மிளகாய்த்தூள்,கரம் மசாலா,தயிர் சேர்க்க வில்லை.ஆனாலும் ருசி பிரமாதமாக இருக்கும்.நீங்க விரும்பிய காய்கறிகளை சேர்த்து செய்யலாம்.

--ஆசியா உமர்.

சுலப புளியோதரை

2011-12-12T06:27:00.013+04:00

தேவையான பொருட்கள்:

சாதம் - ஒரு ப்லேட் நிறைய

புளி - எலுமிச்சை அளவு

எண்ணெய் - 4 டேபிள்ஸ்பூன்

மிளகாய் வற்றல் - 2 +2

முழுமல்லி - 2டீஸ்பூன்

வெந்தயம் - அரைடீஸ்பூன்

பெருங்காயப்பொடி - கால்டீஸ்பூன்

மஞ்சப்பொடி - கால்டீஸ்பூன்

கடுகு உளுத்தம்பருப்பு - 1டீஸ்பூன்

கடலைப் பருப்பு - 1டீஸ்பூன்

வேர்க்கடலை- 1டேபிள்ஸ்பூன்

கருவேப்பிலை- 2 இணுக்கு

உப்பு- தேவைக்கு.

புளிக்கரைசலை ரெடி செய்து கொள்ளவும். சாதம் பக்குவமாக வடித்து ஆற வைக்கவும்.

மல்லி,வெந்தயம்,2 மிளகாய் வற்றல் வறுத்து எடுத்துக் கொள்ளவும்.மொத்தமாகக் கூட போட்டு வறுத்து எடுக்கலாம்.மணம் சூப்பராக இருக்கும்.

வறுத்தவற்றுடன் சிறிது உப்பு சேர்த்து மிக்ஸியில் பொடித்து கொள்ளவும்.

வாணலியில் எண்ணெய் விட்டு காய்ந்ததும் கடுகு உளுத்தம்பருப்பு ,கடலைப்பருப்பு,வேர்க்கடலை,வற்றல்,கருவேப்பிலை போட்டு தாளிக்கவும்.பெருங்காயப்பொடி,மஞ்சப்பொடி சேர்க்கவும்.

ரெடி செய்து வைத்த புளிக்கரைசலை உடன் விடவும். நன்கு கொதிக்கட்டும். சிறிது உப்பு சேர்க்கவும்.

அத்துடன் வறுத்து பொடி செய்த புளியோதரைப் பொடியை சேர்க்கவும்.எல்லாம் சேர்ந்து கொதித்து வற்றி வரட்டும்.

இப்படி எண்ணெய் தெளிந்து காணப்படும்.

வடித்து ஆற வைத்த சாதத்தை சேர்த்து கிளறவும். மூடி வைக்கவும்.சாதம் செட் ஆகட்டும்.குறைந்தது ஒரு மணி நேரம் கழித்து சாப்பிடவும்.

சூப்பர் சுவையுள்ள சுலப புளியோதரை ரெடி.

தொலைதூரப் பயணத்திற்கு கட்டி செல்ல இந்த முறை அருமையாக இருக்கும். தொட்டுக்கொள்ள உங்கள் இஷ்டத்திற்கு சைட் டிஷ் எடுத்து கொள்ளலாம்.

புளியோதரைப் பொடி செய்து வைத்துக் கொண்டால் அவசரத்திற்கு சாதம் மீதியாகும் பொழுது கூட செய்து அசத்தலாம்.

--ஆசியா உமர்.

முல்லைப் பெரியாறு அணை

2011-12-09T00:12:00.006+04:00

பிரச்சனையும் தீர்வும்...

http://player.vimeo.com/video/18283950?autoplay=1

மேற்கண்ட லின்க்கை கிளிக் செய்து பார்க்கவும்.

தமிழக மக்கள் அனைவரும் பார்க்க வேண்டிய குறும்படம் இது.

மெயிலில் வந்தது.

--ஆசியா உமர்.

ஸ்ரிம்ப் ஃப்ரைட் நூடுல்ஸ்/ Shrimp Fried Noodles

2011-12-07T18:41:00.011+04:00

தேவையான பொருட்கள்:

ஃப்ரைட் நூடுல்ஸ் - 1பாக்கெட்

ஃப்ரோசன் ஸ்ரிம்ப்ஸ் - கால் கப்

நறுக்கிய முட்டை கோஸ் - கால் கப்

நறுக்கிய மஞ்சள் கொடைமிள்காய் - கால் கப்

நறுக்கிய வெங்காயம் -கால் கப்

சோயா சாஸ் - 1டீஸ்பூன்

மிளகுத்தூள் - அரைடீஸ்பூன்

எண்ணெய் - 1டேபிள்ஸ்பூன்

உப்பு - தேவைக்கு.

முதலில் ஃப்ரோசன் இறாலை அலசி நீர் வ்டிகட்டி வைக்கவும். அதனோடு பாதி ஸ்பூன் சோயா சாஸ் கலந்து வைக்கவும்.

நூடுல்ஸ் பேக்கை உடைத்து தேவைக்கு தண்ணீர் கொதிக்க வைத்து வேகவைத்து வடித்து வைக்கவும்.

பேனில் எண்ணெய் விட்டு காயவும், நறுக்கிய வெங்காயம்,முட்டை கோஸ், மஞ்சள் கொடைமிளகாய் சேர்த்து வதக்கவும்.

நூடுல்ஸ் பேக்கில் உள்ள மசாலாவை விரும்பினால் சேர்க்கவும், இல்லாவிடில் சிறிது உப்பு சேர்க்கவும்.

அத்துடன் சோயாசாஸில் ஊறிய கூனி இறாலை சேர்க்கவும். வதக்கவும்.

வேக வைத்த நூடுல்ஸ் சேர்த்து பிரட்டவும்.அரைடீஸ்பூன் சோயாசாஸ்,மிளகுத்தூள் சேர்க்கவும். நன்கு பிரட்டி அடுப்பை அணைக்கவும்.

சுவையான ஸ்ரிம்ப் ஃப்ரைட் நூடுல்ஸ் ரெடி.

குழந்தைகளுக்கு மிகவும் பிடிக்கும்.கூனி இறால் ஃப்ரெஷாக கிடைத்தாலும் உபயோகிக்கலாம். மஞ்சள் கொடைமிளகாய் என்று இல்லை,பச்சை கொடைமிளகாய் கூட சேர்க்கலாம்.

--ஆசியா உமர்.

கொள்ளு சட்னி / Horsegram dip

2011-12-05T23:13:00.012+04:00

தேவையான பொருட்கள்;

கொள்ளு - 50 கிராம்

பச்சை மிளகாய் - 4 - 6

வெங்காயம் -1

தக்காளி -1

பூண்டு - 5 பல்

மல்லி,கருவேப்பிலை - சிறிது

எண்ணெய் - 2 டேபிள்ஸ்பூன்

புளி - சிறிது தேவைக்கு

உப்பு - தேவைக்கு
கொள்ளுபயறை மணம் வருமாறு வறுத்து இரவே ஊறவைத்து காலையில் குக்கரில் தேவைக்கு தண்ணீர் வைத்து நான்கு விசில் விட்டு வேக வைத்து எடுத்து கொள்ளவும்.

வெங்காயம்,தக்காளி,பூண்டு நறுக்கி கொள்ளவும்.

வாணலியில் எண்ணெய் விட்டு வெங்காயம் பூண்டு மிளகாய் போட்டு சிறிது வதக்கவும்.மிளகாய் அவரவர் தேவைக்கு கூட்டி குறைத்து கொள்ளலாம்.

அத்துடன் தக்காளியும் சேர்த்து வதக்கவும்.சிறிது புளி,வேக வைத்த கொள்ளு,கருவேப்பிலை,மல்லி இலை சேர்க்கவும்.கலந்து கொள்ளவும்.தேவைப்பட்டால் கொள்ளு வேக வைத்த தண்ணீர் அரைக்கும் பொழுது சேர்க்கவும்.

வதக்கியவற்றை மிக்ஸியில் போட்டு சிறிது தேவைக்கு உப்பும் சேர்த்து சட்னி பதத்தில் அரைத்து எடுக்கவும்.

சுவையான சத்தான கொள்ளு சட்னி ரெடி.

விரும்பினால் தாளிப்பு கர்ண்டியில் சிறிது நல்லெண்ணெய் காயவைத்து கடுகு,உளுத்தம்பருப்பு,மிளகாய் வற்றல்,கருவேப்பிலை தாளித்து சட்னியில் சேர்க்கலாம்.

இதனை இட்லி,தோசையுடன் பரிமாறலாம்.

விரும்பினால் சாதத்துடன் கலந்தும் சாப்பிடலாம்.கொள்ளு வேக வைத்த தண்ணீரை பயன்படுத்தி கொள்ளு ரசம் தயாரிக்கலாம்.

--ஆசியா உமர்.

உருளைக்கிழங்கு சிப்ஸ்/ Potato Chips

2011-12-04T21:51:00.012+04:00

தேவையான பொருட்கள்;

உருளைக்கிழங்கு - அரைக்கிலோ

(மீடியம் சைஸ் )

மிளகாய்த்தூள் - 1 டீஸ்பூன்

பெருங்காயத்தூள் - அரைடீஸ்பூன்

உப்பு,எண்ணெய் - தேவைக்கு.

உருளைகிழங்கை நன்கு கழுவி துடைத்து எடுக்கவும்.
இப்படி மெலிதாக சீவி வைக்கவும்.

அடுப்பில் வாணலி வைத்து தேவைக்கு எண்ணெய் விட்டு சூடு செய்யவும்.

மிளகாய்த்தூள் ,உப்பு,பெருங்காயத்தூள் சேர்த்து கலந்து வைக்கவும்.

எண்ணெய் காய்ந்ததும் கொஞ்சம் கொஞ்சமாக சீவிய உருளைக்கிழங்கை போட்டு பக்குவமாக பொன்னிறத்தில் பொரித்தெடுக்கவும்.

சூட்டுடனேயே ரெடி செய்த பொடியைத் தேவைக்குத் தூவி குலுக்கவும்.

சுவையான உருளைக்கிழங்கு சிப்ஸ் ரெடி.

இதனை பிஸிபேலாபாத், தயிர் சாதம்,எலுமிச்சை சாதம்,புளியோதரை, தக்காளி சாதம்,புதினா சாதம்,வெஜிடபிள் பிரியாணி இப்படிசொல்லிட்டே போகலாம், வெரட்டி ரைஸ் உடன் சாப்பிடலாம். ஏன் சும்மாவே சாப்பிடலாம். வாயு தொந்திரவு உள்ளவர்கள் கவனம்.

--ஆசியா உமர்.

தம் ஆலுகோபி / Dum AlooGobi

2011-12-02T22:54:00.017+04:00

தேவையான பொருட்கள்;

உருளைக்கிழங்கு - 200கிராம்

காளிப்ளவர் - 200 கிராம்

எண்ணெய் - 4-6 டேபிள்ஸ்பூன்

மசாலா மிக்ஸ் செய்து கொள்ள:

புளிக்காத தயிர் - 2 டேபிள்ஸ்பூன்

மிளகாய்த்தூள் - அரை டீஸ்பூன்

மல்லித்தூள் - 1 டீஸ்பூன்

சீரகத்தூள் - 1டீஸ்பூன்

பெருஞ்சீரகத்தூள் - 1டீஸ்பூன்

மஞ்சள்தூள்- கால்டீஸ்பூன்

கரம் மசாலா - அரைடீஸ்பூன்

தாளிக்க :

மிளகு, சீரகம், சோம்பு -சிறிது

கிராம்பு - 2

பட்டை - 1

பிரியாணி இலை -1

வெங்காயம் பொடியாக நறுக்கியது - 1

இஞ்சி பூண்டு பேஸ்ட் - 2 டீஸ்பூன்

உப்பு - தேவைக்கு.

மல்லி இலை - சிறிது அலங்கரிக்க.

உருளைக்கிழங்கை தோல் நீக்கி துண்டுகளாக்கி கொள்ளவும். காளிப்ளவரை சிறிய பூக்களாக பிரித்து கொதிக்கும் நீரில் போட்டு வடிகெட்டி எடுத்து வைக்கவும்.

ஒரு பவுலில் தயிருடன் மேலே குறிப்பிட்ட பொருட்களை கலந்து வைக்கவும்.

ஒரு சாலோ நான்ஸ்டிக் ப்ரை பேனில் எண்ணெய் விட்டு காய்ந்ததும் நறுக்கி உருளைக்கிழங்கு,காளிப்ளவர் போட்டு,சிறிது உப்பு தூவி பொரித்து எடுக்கவும்.

பொரித்த பிறகு இருக்கும் எண்ணெய் தாளிக்க பயன்படுத்தலாம்.

கடாயில் எண்ணெய் விட்டு காயவும் தாளிக்க கொடுத்த பொருட்களை சேர்த்து பொரிய விடவும்.நறுக்கிய வெங்காயம் சேர்த்து வதக்கவும். தயிருடன் கலந்து வைத்த மசாலா மிக்ஸை சேர்க்கவும். நன்கு கொதி வரட்டும்.

பொரித்த உருளை காளிப்ளவர் சேர்த்து பிரட்டவும். ஒரு கப் தண்ணீர் சேர்க்கவும்.

மூடி போட்டு 5 நிமிடம் மசாலாவுடன் சேர்ந்து வேகவிடவும். உப்பு சரி பார்க்கவும்.

கிரேவி கெட்டியாகி கமகமவென்ற மணத்துடன் இருக்கும்.அடுப்பை அணைக்கவும். நறுக்கிய மல்லி இலை தூவி பரிமாறவும்.

சுவையான தம் ஆலு கோபி ரெடி.இதனை சப்பாதி,நாண்,ப்லைன் ரைஸ் உடன் பரிமாறலாம்.

கிரேவியாக வேண்டும் என்றால் சிறிது தண்ணீர் சேர்த்து கொதிக்க வைத்து இறக்கலாம்.

அவரவர் தேவைக்கு மசாலா கூட்டி, குறைத்து கெட்டித்தனமைக்கு தகுந்தபடி வைத்துக் கொள்ளலாம்.

--ஆசியா உமர்.

ப்லைன் நாண் /Plain Naan

2011-11-29T08:48:00.016+04:00

தேவையான பொருட்கள்;

மைதா மாவு - 2 கப்

இன்ஸ்டண்ட் ஈஸ்ட் - முக்கால்டீஸ்பூன்

பேக்கிங் பவுடர் - கால்டீஸ்பூன்

எண்ணெய் - 2டேபிள்ஸ்பூன்

தயிர் - 2 டேபிள்ஸ்பூன்

சீனி - 1டீஸ்பூன்

உப்பு - 1டீஸ்பூன்

முக்கால் டீஸ்பூன் ஈஸ்ட்டை அரைகப் வெதுவெதுப்பான நீரில் கரைத்து 10 நிமிடம் வைக்கவும்.

மாவுடன் பேக்கிங் பவுடர்,சீனி,உப்பு முதலில் கலந்து கொள்ளவும்.பின்பு புளிக்காத தயிர் 2டேபிள்ஸ்பூன், எண்ணெய்,ஈஸ்ட் கலந்த நீர் சேர்த்து கலந்து மாவை தளர்வாய் பிணைந்து கொள்ளவும்.மாவு சப்பாத்திக்கு போல் இல்லாமல் சிறிது தளர்வாய் குழைக்க வேண்டும்.

மாவு குழைக்கும் பொழுது ஈஸ்டில் கலக்க வெது வெதுப்பான நீருக்கு பதில் வெது வெதுப்பான பால் கூட சேர்த்து கொள்ளலாம்.விரும்பினால் அத்துடன் முட்டை கூட சேர்க்கலாம்.

பின்பு மாவை மூடி 4 மணி நேரம் வைக்கவும்.

மாவு இப்படி பொங்கி இருமடங்காகி காணப்படும்.

நான் கேஸ் ஓவன் உபயோகித்து செய்தேன். எனவே பேக்கிங் ட்ரேயில் இவ்வாறு அலுமினியம் ஃபாயில் போட்டு எண்ணெய் அல்லது மாவு தடவி வைக்கவும்,நாண்ஸ்டிக் ட்ரே என்றால் அலுமினியம் ஃபாயில் வேண்டாம்.

மாவை உருண்டைகளாக பிரித்து சிறிது எண்ணெய் தடவி வைக்கவும்.மாவை நீள்வட்டமாக மாவில் தோய்த்து பரத்தி கொள்ளவும்.

ஓவனை ப்ரீஹீட் செய்து வெப்பம் மேக்சிமம் செட் செய்து கொள்ளவும்.பரத்திய மாவை ட்ரேயில் வைக்கவும்.

நாண் இப்படி பொங்கி வரும்.உடன் திருப்பி போட்டு சிறிது நேரத்தில் எடுக்கவும்.5 நிமிடத்தில் ஆகிவிடும்.

சுவையான ப்லைன் நாண் ரெடி.விரும்பினால் சிறிது பட்டர் தடவி பரிமாறலாம்.

--ஆசியா உமர்..

ஹிஜ்ரி 1433 -இஸ்லாமிய புத்தாண்டு

2011-11-26T10:07:00.007+04:00

ஹிஜ்ரி ஆண்டு,முஹர்ரம் எனப்படும் அரபி மாதத்தில் துவங்கும்.இது 12 மாதங்களைக் கொண்டிருந்தாலும் ஆண்டின் மொத்த நாட்கள் 354 ஆக உள்ளது.காரணம் இது பிறையை அடிப்படையாகக் கொண்டு அமைகின்றது.

அனைவருக்கும் இந்த இனிய நாளில் அன்பான புத்தாண்டு

நல்வாழ்த்துக்களை தெரிவித்துக் கொள்கிறேன்.

--ஆசியா உமர்.

ப்ரக்கோலி சூப் / Broccoli soup

2011-11-26T01:05:00.008+04:00

தேவையான பொருட்கள்;

நறுக்கிய ப்ரக்கோலி - ஒரு கப்

தண்ணீர் - 4 கப்

சிக்கன் சூப் கியூப் - 1

டொமட்டோ சாஸ் - 2 டேபிள்ஸ்பூன்

சோயா சாஸ் - 1டீஸ்பூன்

கார்ன் ஃப்லோர் - 3 -4 டீஸ்பூன்

ப்ரெட் ஸ்லைஸ் - 2

உப்பு, மிளகுத்தூள் - தேவைக்கு
நறுக்கிய ப்ரக்கோலி, சூப் கியூப், தண்ணீர் சேர்த்து கொதிக்க வைக்கவும். கொதித்த பின்பு சிம்மில் 5 நிமிடம் வைக்கவும்.

கார்ன் ஃப்லோரை சிறிது தண்ணீர்ல் கரைத்து விடவும்.சூப் கெட்டியாகி விடும்.

அத்துடன் சோயாசாஸ், டொமட்டோ சாஸ் சேர்க்கவும், மிளகுத்தூள் தூவி கலந்து விடவும்.உப்பு சரிபார்க்கவும்.
ப்ரெட் ஸ்லைசை சிறிய துண்டுகளாக்கி நெய் சேர்த்து அல்லது சும்மாவே மைக்ரோவேவில் ஒன்றரை நிமிடம் வைத்தால் ரஸ்க் போல் ஆகி விடும்.அல்லது ஒரு தோசைக்கலத்தில் கூட ப்ரெட் துண்டுகளை ரோஸ்ட் செய்து எடுக்கலாம்.
ரெடியான சூப்பில் ரோஸ்ட் செய்த ப்ரெட் துண்டுகளை சேர்த்து அலங்கரித்து பரிமாறவும்.பரிமாறும் பொழுது தான் ரோஸ்டட் ப்ரெட் துண்டுகளை சேர்க்க வேண்டும்.

சுவையான ப்ரக்கோலி சூப் ரெடி.

--ஆசியா உமர்.

ப்ரக்கோலி எக் ஸ்டிர் ஃப்ரை / Broccoli egg stir fry

2011-11-23T23:11:00.015+04:00

தேவையான பொருட்கள்;

ப்ரக்கோலி -2கப்

இஞ்சி பொடியாக நறுக்கியது - 1டேபிள்ஸ்பூன்

பூண்டு பொடியாக நறுக்கியது - 1டேபிள்ஸ்பூன்

வெங்காயம் பொடியாக நறுக்கியது - 2 டேபிள்ஸ்பூன்

சோயா சாஸ் - 1 டீஸ்பூன்

மிளகுத்தூள் - கால்டீஸ்பூன்

முட்டை -1

எண்ணெய் - 2 டேபிள்ஸ்பூன்

உப்பு - மிகச்சிறிது தேவைக்கு

இஞ்சி,பூண்டு,வெங்காயம் பொடியாக நறுக்கி கொள்ளவும், இதழாக பிரித்த ப்ரக்கோலி,மற்றும் இளந்தண்டை மெலிதாக நறுக்கி கொள்ளவும். நறுக்கிய ப்ரக்கோலியை சுடுநீரில் போட்டு உடன் வடிகட்டி எடுத்து வைக்கவும்.

கடாயில் எண்ணெய் விட்டு காயவும்,நறுக்கிய இஞ்சி,பூண்டு,வெங்காயம் போட்டு வதக்கவும்.பின்பு ப்ரக்கோலியை சேர்க்கவும்.

நன்கு வதக்கவும்,மிகச்சிறிது உப்பு சேர்க்கவும்.

பின்பு சோயாசாஸ்,மிளகுத்தூள் சேர்க்கவும்.முட்டை சேர்க்காமல் இப்படியே பிரட்டியும் சாப்பிடலாம்.

முட்டையை கலந்து விடவும்.பிரட்டி விடவும்.

விரும்பினால் நறுக்கிய மல்லி இலை தூவி இறக்கவும்.

சுவையான ப்ரக்கோலி எக் ஸ்டிர் ஃப்ரை ரெடி.

இதனை ப்ரெட்டுடன் சாப்பிடலாம்.விரும்பியவற்றுடன் சைட் டிஷ் ஆக வைத்து சாப்பிடலாம்.

பின் குறிப்பு :

காளிப்ளவர்,முட்டைகோஸ் முட்டை பொரியலை விட இந்த ப்ரக்கோலி முட்டைப்பொரியல் சுவை மிக அருமையாக இருக்கும்.சத்தானதும் கூட.சாதத்திற்கும் தொட்டு சாப்பிட மிகப் பொருத்தமாக இருக்கும்.

--ஆசியா உமர்..

கிட்ஸ் போன்லெஸ் ஃபிஷ் ஃப்ரை

2011-11-22T07:48:00.017+04:00

தேவையான பொருட்கள்;

முள்ளில்லாத சிறிய மீன் துண்டுகள் - 8

சிக்கன் 65 மசாலா -1 டீஸ்பூன்

மிளகுத்தூள் - கால்டீஸ்பூன்

எலுமிச்சை ஜூஸ் -பாதி பழம்

கார்ன்ஃப்லோர் அல்லது அரிசிமாவு - அரைடீஸ்பூன்

கடலை மாவு - அரைடீஸ்பூன்

உப்பு - சிறிது தேவைக்கு

எண்ணெய் - 2 டேபிள்ஸ்பூன்

மீனை சுத்தம் செய்து கட் செய்து கழுவி தண்ணீர் வடிகட்டிஎடுக்கவும், பின்பு மீனில் சிறிது உப்பு,லைம் ஜூஸ் சேர்த்து பிரட்டி வைக்கவும்.

சிக்கன் 65 மசாலா சேர்த்து பிரட்டி வைக்கவும்.உப்பு பார்த்து கவனமாக சேர்க்கவும்.

அடுத்து மீனில் மிளகுத்தூள், கார்ன்ஃப்லோர்அல்லது கடலை மாவு அல்லது அரிசிமாவு சேர்த்து மீன் துண்டில் நன்கு படும் படி விரவி வைக்கவும்.

ரெடி செய்து ஃப்ரிட்ஜில் அரைமணி அல்லது ஒரு மணிநேரம் வைத்து எடுத்து பொரித்தால் அருமையாக இருக்கும்.

ஒரு கடாயில் எண்ணெய் விட்டு நன்கு காயவும், மீன் துண்டுகளைப் போட்டு

இரண்டு புறமும் திருப்பி பொரித்து எடுக்கவும்.

சுவையான கிட்ஸ் போன்லெஸ் ஃபிஷ் ஃப்ரை ரெடி.

புதினா அதிகமாகயிருந்தால்..

2011-11-19T08:55:00.009+04:00

பொதுவாக புதினா வாங்கி சமையலுக்கு உபயோகித்து விட்டு மீதியை ஃப்ரிட்ஜில் வைத்தால் அது விரைவில் கெட்டுப் போய்விடும்.

என்னைப் போல் அன்றாடம் ஒரு சிலர் புதினாவை உபயோகிப்பதுண்டு. அவர்களுக்கு இந்த டிப்ஸ் பயன் தரும்.தேவைப்படும் பொழுது தான் நாம் புதினா வாங்குவோம்,எப்பவும் மற்ற உலர் பொருள் மாதிரி புதினாவையும் நம் வீட்டில் வைத்துக் கொள்ளலாம்.

சரி இப்ப உலர் புதினா எப்படி செய்வது என்று பார்க்கலாம்.

புதினா நிறைய கிடைக்கும் பொழுது வாங்கி, பழுத்த,கருத்த இலைகளை நீக்கி விட்டு நல்ல இலைகளாக ஆய்ந்து சுத்தமாக கழுவி தண்ணீர் வடிகட்டவும்.

நன்றாக தண்ணீர் வடிந்த பின்பு ஒரு பேப்பரில் அல்லது கிச்சன் டவல் பயன்படுத்தி உலர வைக்கவும்.

சுத்தமாக ஈரத்தன்மை இல்லாமல் புதினா உலர்ந்த பிறகு ஒரு திறந்த டப்பாவில் எடுத்துக் கொள்ளவும்.

ஃப்ரிட்ஜில் அதனை மீடியம் டெம்பரேச்சரில் வைக்கவும். ஃப்ரிட்ஜ் டெம்பரேச்சர் அதிக ஜில்லுன்னு இருந்தால் புதினா கருத்து விடும்.டப்பா திறந்து இருக்க வேண்டும். மூன்று நான்கு நாட்கள் கழித்து எடுத்து பார்த்தால் காயந்த நிலையில் பசுமை நிறம் மாறாமல் இருக்கும்.

அதனை நாம் பாட்டிலில் அடைத்து வைத்தால் எப்பவும் மணக்கும்

உலர் புதினா ரெடி.

இதனை நாம் தேவைக்கு எப்பொழுதும் போல சமையலில் குருமா,பிரியாணி,மட்டன் சிக்கன் சமையலில்,ப்ளாக் டீ போடும் பொழுது பயன் படுத்தினால் அருமையாக இருக்கும்.

--ஆசியா உமர்.

மெய்யாலுமே! இசையும் கதையும் -தொடர் பதிவு

2011-11-16T10:00:00.009+04:00

அதிரா என்னை தொடர் பதிவிற்கு அழைத்திருக்காங்க.இசையும் கதையும் இலங்கை வானொலியில் கே.எஸ்.ராஜா நடத்திய மிகவும் பிரசித்தமான நிகழ்ச்சியாம்.அவங்க எவ்வளவு அழகாக சொல்லியிருக்காங்க பாருங்க.

நானும் சின்னதாக ஒரு கதையை சொல்லி முடித்து விட்டேன்.

சுமதி கிராமத்தில் வளர்ந்த துறுதுறுப்பான குறும்பான பெண்.வயல் வெளியும் ஆறும் அருவியும் ஊர் மக்களும் அவள் நினைத்து நினைத்து பார்க்கும் விஷயங்கள்.அதற்கு ஈடு இணை எதுவுமே இல்லை என்று அந்த நினைவில் சிலாகித்து வாழ்பவள்.

ஏகப்பட்ட கனவுகளுடன் அவள வெளியூருக்கு படிக்க சென்றாள்.படித்து முடித்து வேலை தேட சென்னை சென்ற பொழுது அவளை வரவேற்று அவளுக்கு உதவ வந்த சொந்தக்கார பையன் சேகருடன் சுமதி அடித்த லூட்டி தான் இது

அவள் ஊர் திரும்பிய பின் அவனின் நினைவு மனதை விட்டு நீங்காமல் தவித்த அந்த உணர்விற்கு பெயர் தான் காதலோ! அவளின் தவிப்பு அந்த இறைவனுக்குப் பிடித்துப் போய் விட்டது போலும்.அதைத் தொடர்ந்து வீட்டிலும் சுமதிக்கும் சேகருக்கும் திருமணம் செய்தால் மிகவும் பொருத்தம் என்று பேசிக்கொண்டார்கள்.சேகர் வீட்டில் பெண் தருவதாய் சொன்ன பொழுது, படித்த வேலைக்குப் போகும் பெண் வேண்டாம் என்று சொல்லவே,வீட்டில் உள்ளவர்கள் வேலையை விட நல்ல வரனே முக்கியம் என்று சுமதியின் வேலைக்குச் செல்லும் ஆசைக்கு அணை போட்டனர்.

நிச்சயதார்த்தமும் நடந்தது,ஆனால் திருமணத்திற்கு பல தடைகள் வந்து சில வருடங்கள் காத்திருக்கும் கட்டாயம். சுமதியின் வீட்டில் வேறு வரன் பார்க்கலாமா என்று யோசிக்கவே என்ன செய்வது என்று புரியாமல் அந்த இறைவன் மீதே பாரத்தை போட்டு விட்டு, சேகரை பார்த்து பேசிய தருணங்களை எண்ணிய படி காலத்தை கடத்தி வந்தாள் சுமதி.இதற்கிடையில் அவர்கள் இருவரும் கடிதங்களும், வாழ்த்து அட்டைகளும் பகிர்ந்து கொண்டிருந்தனர்.

இதனை எண்ணி கலங்கிய சுமதி மனதளவில் காதலித்து விட்டு எப்படி இன்னொருவருக்கு கழுத்தை நீட்டுவது என்று குழம்பி தைரியமாக தன் சகோதரர்களிடம் வேறொருவரை மணக்க முடியாது, எத்தனை வருடம் காத்திருந்தாலும் சேகரையே மணப்பேன் என்றும் சொன்னதால் வேறு வரன் பார்ப்பதற்கு முற்றுப்புள்ளி வைக்கப்பட்டது.சேகரும் எந்த சூழ்நிலையிலும் அவளையே மணப்பேன் என்று வாக்குறுதி கொடுத்திருந்ததால் நம்பிக்கையுடன் காத்திருந்தாள்.

காலமும் கனிந்தது,எல்லாம் வல்ல இறைவனின் அருளால் இருவருக்கும் திருமணம் முடிந்து மனமொத்த தம்பதிகளாய் வாழ்க்கையை தொடர்கின்றனர்.

இசையும் கதையும் இனிமையாக இருந்ததா?

இதனை தொடர மகி, ஆமினாவை அழைக்கிறேன்.அழகாக கதை சொல்லும் திறம் படைத்தவர்கள் என்பதாலும், தொடரை தொடர்வீர்கள் என்ற நம்பிக்கையாலும்.

மெய்யாலுமே :) :)...

--ஆசியா உமர்.

பின் குறிப்பு :

பாடலை பார்க்க சிரமமாயிருந்தால் யுடியூபை கிளிக் செய்து பார்க்கவும்...

கேபேஜ் சூப் / Cabbage Soup

2011-11-13T22:08:00.015+04:00

தேவையான பொருட்கள்:

முட்டை கோஸ் நறுக்கியது - 1கப்

தண்ணீர் - 4கப்

சூப் கியூப் - 1

சோயா சாஸ் - 1 டீஸ்பூன்

ஒயிட் வினிகர் - 1டீஸ்பூன்

கார்ன் ஃப்லோர் - 4 டீஸ்பூன்

எண்ணெய் - 2டீஸ்பூன்

நறுக்கிய வெங்காயம் - 2 டேபிள்ஸ்பூன்

மிளகுத்தூள் - தேவைக்கு

முட்டை வெள்ளைக்கரு - 1 (விரும்பினால்)

உப்பு - தேவைக்கு
சூப் வைக்கும் பாத்திரத்தில் நான்கு கப் தண்ணீர் எடுத்துக்கொண்டு அதில் சூப் கியூப் சேர்த்து சூடு படுத்தவும்.

நறுக்கிய முட்டை கோஸ் சேர்த்து வேக விடவும்.

கார்ன் ஃப்லோர் சிறிது தண்ணீரில் கரைத்து சேர்க்கவும்.சூப் கெட்டியாகிவரும்.

ஒரு தாளிப்பு கரண்டியில் எண்ணெய் விட்டு காயவும் நறுக்கிய வெங்காயம் சேர்த்து இளஞ்சிவப்பாக வதக்கவும்.வதக்கிய வெங்காயத்தை கொதிக்கும் சூப்பில் சேர்த்து சோயாசாஸ்,வினிகர்,மிளகுத்தூள் சேர்த்து கலந்து பரிமாறினால் சுவையான கேபேஜ் சூப் ரெடி.

இது முட்டை வெள்ளைக்கரு சேர்க்காமல் செய்தது.

இப்ப எப்படி முட்டை வெள்ளைக்கரு சேர்ப்பதுன்னு பார்ப்போம்.

கார்ன் ப்லோர் கரைசல் சேர்த்து கொதிவரவும் அடித்து வைத்த முட்டை வெள்ளைக்கருவை கொடி போல் விட்டு கலந்து விடவும்.இப்படி காணப்படும்.

பின்பு சோயாசாஸ்,வினிகர்,தேவைக்கு மிளகுத்தூள்,தாளித்த வெங்காயம் சேர்த்து கலந்து விடவும். அடுப்பை அணைக்கவும்.சூடாக பரிமாறவும்.

சுவையான கேபேஜ் சூப் வித் எக் ஒயிட் ரெடி. செமையாக இருக்கும்.செய்து பாருங்க.

வெங்காயம் வதக்கி சேர்ப்பது தான் இந்த சூப்பிற்கு அதிக சுவையை கொடுக்கும்.சூப் கியூபில் உப்பு இருக்கும்,எனவே உப்பு சேர்க்க தேவையில்லை.தேவைப்பட்டால் உப்பு சிறிது சேர்த்து கொள்ளலாம்..நான் எந்த சூப் செய்தாலும் கேபேஜ் சேர்க்காமல் செய்வதில்லை.என் கணவருக்கு கேபேஜ் மிகவும் பிடிக்கும். மிகவும் சத்தானதும் கூட..

--ஆசியா உமர்..

கீரை பருப்பு

2011-11-09T08:14:00.014+04:00

தேவையான பொருட்கள் ;

முருங்கைக்கீரை - 2கப்

துவரம் பருப்பு - இரண்டு கைப்பிடியளவு

வெங்காயம் - 2

பூண்டு - 6பல்

துருவிய தேங்காய் - 3டேபிள்ஸ்பூன்

மஞ்சள் தூள் - கால்ஸ்பூன்

சீரகத்தூள் - கால்ஸ்பூன்

எண்ணெய் - 2 டேபிள்ஸ்பூன்

கடுகு,உ.பருப்பு - 1டீஸ்பூன்

மிளகாய் வற்றல் - 3

உப்பு - தேவைக்கு

கீரையை ஆய்ந்து கழுவி எடுத்து கொள்ளவும்.

பருப்பை கால்மணி நேரம் ஊறவிட்டு மஞ்ச சீரகத்தூள் சேர்த்து பூண்டு பல் சேர்த்து குக்கரில் இரண்டு விசில் வைத்து வேகவைத்து எடுக்கவும்.

வாணலியில் எண்ணெய் விட்டு காயவும்,கடுகு,உ.பருப்பு,மிளகாய் வற்றல் போட்டு வெடிக்கவும், வெங்காயம் சேர்த்து வதக்கவும்.

சிறிது வெங்காயம் வதங்கியதும் கீரையை சேர்த்து வதக்கவும்,சிறிது தண்ணீர் தெளித்து மூடி வேக விடவும்,முருங்கைக்கீரை சிறிது மசிய வெந்தால் தான் சாப்பிட இலகுவாக ருசியாக இருக்கும்.

வெந்து வரும் கீரையுடன் வேகவைத்த பருப்பை சேர்க்கவும்.

கீரை பருப்பு கலந்து விட்டு உப்பு சேர்த்து சிறிது மூடி விடவும்.எல்லாம் சேர்ந்து வெந்து மணம் வரும்.

தேங்காய் துருவல் சேர்த்து பிரட்டி விடவும்.

சுவையான சத்தான கீரை பருப்பு ரெடி..

பெருநாள் கொண்டாட்டம், விருந்தினர் வருகை,விஷேச சமையல் என்றும் மிச்சம் மீதியால் ஃப்ரிட்ஜ் நிரம்பி வழிந்தாலும் மனம் ஏனோ கீரை சாப்பிட வேண்டும் என்று ஏங்கியது.

சென்ற மாதம் அல் ஐனில் காற்றுடன் பெய்த மழையில் பக்கத்தில் இருந்த ஒரு முருங்கை மரமும் ஒடிந்து விழுந்தது.சரி இனி நாம் கீரை சாப்பிட்டது போல் தான் என்று மனதை தேற்றிக் கொண்டேன்.

தற்செயலாக வாக்கிங் போனப்ப அந்த மரம் மீண்டும் துளிர்த்து பச்சை பசேல் என்று அழகாக இருந்தது,அதனை ஏக்கத்துடன் பார்த்து விட்டு வீடு வந்து கீரை கிடைத்தால் சமைக்கலாமேனு நினைச்சேன், காலிங் பெல் சத்தம்,தமிழ் பேசுகிற அந்த தம்பி வந்து, அக்கா முருங்கைக் கீரை வேண்டுமான்னு கேட்க அப்புறமென்ன மணக்க மணக்க கீரை சமையல் தான்..

--ஆசியா உமர்..

புனித ஹஜ் பெருநாள் நல்வாழ்த்துக்கள்...

2011-11-05T20:56:00.005+04:00

அன்பார்ந்த என் இனிய நட்புள்ளங்களுக்கும் உறவினர்களுக்கும் மற்றும் அனைவருக்கும் புனித ஹஜ் பெருநாள் நல்வாழ்த்துக்கள்...

--ஆசியா உமர்...

எங்க வீட்டு பத்மினியும் தோட்டமும்

2011-11-01T07:40:00.036+04:00

இவ தாங்க எங்க வீட்டு பத்மினி.சில வருடங்கள் முன்பு கார் ஓட்டப் பழக ஒரு பழைய கார் வாங்கலாம்னு மார்க்கெட்டில் தேடிப்பிடித்து வாங்கி வந்தோம் இந்த ராணியை. ஆனால் அப்ப அப்ப அவ மக்கர் பண்ணத்தான் செய்வாள்..

ஆஹா பத்மினி என்ன அழகு! பாருங்களேன்...

காம்பவுண்ட் வெளியே வளர்க்க பெடிலாந்தஸ் அழகாக இருக்கும்,ஆடு, மாடு கூட தின்னாது.

அவளை விதம் விதமாக படம் எடுத்தோம்..

அவளை எப்படி படம் எடுத்தாலும் அழகாக இருப்பாள், அவளை அழைத்துக்கொண்டு குற்றாலம்,தூத்துக்குடி மற்றும் நெல்லையை வலம் வந்தது ஒரு காலம்.. ஏன் தாமிரபரணி ஆற்றங்கரை நெல்லை பாலத்திற்கு அடியில் கூட எங்க கூட வந்திருக்கா,அவளோட போட்டோக்கள் நிறைய இருக்கு அதை எல்லாம் போடனும் என்றால் அதற்கு இந்த இடுகை போதாது, உங்களுக்கும் போரடித்து விடும்..ஒரு சோகம்ங்க ,இப்ப அவ எங்க இருக்காளோ !

அப்படியே எங்க வீட்டில் உள்ள செடி கொடிகளைப் பாருங்க,இரண்டு வகையான கொடியை பின்னி எங்க வீட்டு போர்டிகோவின் மேல் உள்ள ஒப்பன் டெரஸில் வளர்த்து விட்டிருந்தேன்..மஞ்சளும் வெள்ளையுமாக அழகாக பூக்கும்..

இவள் மணமணக்கும் மல்லி.. அவளுக்கு கொடி கட்டி விட வேண்டும் என்று ஒவ்வொரு முறையும் நினைப்பேன்,அவள் கொடியாக இல்லாமல் என் சோம்பேறித்தனத்தால் செடியாகத்தான் இன்னும் இருக்கிறாள்...

ஆர்னமெண்டல் பாம், கிறிஸ்த்மஸ் மரம் இவங்க எல்லாம் ரொம்ப பெரிசாக இப்ப வளர்ந்துட்டாங்க..

பன்னீர் ரோஜா,பெடிலாந்தஸ்,பில்லர் காக்டெஸ் நான் கவனிக்காததால் இப்படி இருக்காங்க..

ஒரு பக்கமாக செம்பருத்தி,இலட்சக்கொட்டை மரம்,மாதுளை,கருவேப்பிலை,எலுமிச்சை,ஒற்றையாய் ஒரு தென்னை இவங்கள்ளாம் இருக்காங்க..
அப்படியே பின்னாடி வந்தால் எங்க வீட்டு மகராசி முருங்கை ,காய் ஒவ்வொன்றும் அவ்வளவு நீளம், வந்தவங்க எல்லாம் பறிச்சிட்டு போவாங்க.. ரொம்ப சந்தோஷமாக இருக்கும்.அத்தனை ருசி இந்தக்காயை மட்டன் சால்னாவில் போட்டால் என்ன ருசி தெரியுமா?

இந்த வேப்பங்கன்றுகள் எல்லாம் நான் தானமாக கொடுக்கவென்றே வளர்ப்பேன், யாருக்காவது வேண்டுமான்னு கேட்டு கேட்டு கொடுப்பேன்..

இந்த அஸ்பராகஸ்,டைஃபென்பெக்கியா,ரோஸ் எல்லாம் என் செல்லங்கள்..இந்த டைபென்பெக்கியாவை எங்களோட ஃபேமிலி ப்லாண்ட் என்று எல்லோரிடமும் சொல்வதுண்டு,இதனை நாங்க தூத்துக்குடியில் இருந்து கொண்டு வந்து பின்பு மேலப்பாளையத்தில் வளர்த்து இப்ப இந்த வீட்டில் இருக்கு.இதற்கு என் மகனின் வயது...மேஜராயிட்டா..பத்திரமா இருக்கியாடா செல்லம் :(((( ?

இந்த சின்ன லான் நாங்க மெயிண்டெயின் பண்ணாமல் இப்படி இருக்கு..கொரியன் கிராஸ் என்று சொல்லி நாகர்கோவிலில் இருந்து அதனை தருவித்து, நிலத்தை பதப்படுத்தி, நட்டு, பச்சை பிள்ளைக்கு பால் கொடுப்பது போல் அப்ப தண்ணீர் காட்டி வாடாமல் வதங்காமல் எட்டு வருடமாக வளர்த்த லான் தான் இப்ப பட்டுப்போய் பார்க்கவே பாவமாய்...

வந்ததே வந்திட்டீங்க அப்படியே வீட்டுக்குள் ஒரு நடை வாங்க...நிச்சயமா சமைத்து அச்த்துவேன்...

மாய உலகம் ராஜேஸ் அவருடைய இந்த பதிவில் பண்ணையாரும் பத்மினியும் என்ற குறும்படத்தை பகிர்ந்திருந்தார்.மிக்க நன்றி மாய உலகம்.என்னை அந்தப்படம் மிகவும் கவர்ந்தது. அதனை நீங்களும் ரசியுங்களேன்.

--ஆசியா உமர்.

முடியலை ஆனால் முடியும்...(சவால் சிறுகதை - 2011)

2011-10-27T01:45:00.018+04:00

வராண்டாவில் திடு திடுவென்று ஓடும் சத்தம் கேட்டு, எதற்கும் பயப்படாத ரம்யா கூட அதிர்ந்து விட்டாள்.

படபடக்கும் நெஞ்சை பிடித்து கொண்டு கதவில் பொருத்திய லென்ஸ் வழியாக உற்று நோக்கினாள். வெளியே நிசப்தத்தை தவிர எதையும் பார்க்க முடியவில்லை.

மெதுவாக கதவை திறந்து பார்க்கலாமா என்று யோசித்தவள் தாழ்ப்பாளில் கைவைக்க தானாகவே திறந்து கொண்டது. மூடிய கதவு எப்படி திறந்தது ? என்று குழப்பத்துடன் பக்கத்து படுக்கையை பார்க்க காலியாக இருந்தது, ஏதோ விபரீதம் என்பதை மட்டும் புரிந்து கொண்டாள். தோழி சுதாவையும் காணவில்லை. இருவரும் ஒரே ஊரைச் சேர்ந்தவர்கள், சென்னையில் சாஃப்ட்வேர் கம்பெனியொன்றில் இருவருக்கும் வேலையாதலால் இருவரும் ஒரே ரூமில் தங்கி வேலைக்கு போய் வருகிறார்கள்.

தன்னிடம் கூட சொல்லாமல் இந்த சுதா அர்த்த ராத்திரியில் எங்கே போயிருப்பாள் என்ற கவலை ஆட்டி படைக்க திறந்திருந்த கதவை மூடிவிட்டு செல்போனை எடுத்தாள். சுதாவின் நம்பருக்கு டயல் செய்ய, போனை எடுத்தது ஒரு கனத்த குரல். சுதா தன்னுடன் இருப்பதாகவும், இதைப்பற்றி மூச்சு விட்டால் உன் கதி அதோகதி தான் என்றது, பயத்தில் ரம்யாவிற்கு வியர்த்துக் கொட்டியது.

அந்த மர்ம நபர் வேறு ஒரு நம்பரை கொடுத்து இனி அதற்கு போன் செய்யும் படியும் சுதாவின் நம்பரை தான் செயல் இழக்கச் செய்யப் போவதாகவும் சொல்லி போனை வைத்து விட்டான். இதில் ஏதோ மர்மம் இருப்பதாக உணர்ந்தாள் ரம்யா.

இந்த செய்தியை எப்படி யாரிடமும் பகிராமல் இருப்பது, ஊரில் இருக்கும் சுதாவின் பெற்றோர் இவளிடம் கேட்டால் என்ன சொல்வது என்று உடனே தன் கார்டியனான எஸ்.பி கோகுலிற்கு செய்தியை தெரிவித்து ரகசியமாக சுதாவை தேடித்தரும்படி தெரிவித்தாள்.

காலையில் விழித்து தன் வேலைகளைப் பார்க்க முடியாமல் தவித்த ரம்யாவிற்கு நிம்மதியே போய்விட்டது.

எஸ்.பி. கோகுலிற்கு போன் செய்து விபரம் கேட்ட பொழுது இரண்டு நாட்களில் எப்படியும் கண்டு பிடித்து விடுவதாகச் சொன்னார்.

ரம்யாவிற்கு தன் மீது உயிரையே வைத்திருக்கும் விஷ்ணுவின் நினைவு வர அவனை தொடர்பு கொண்டு, நடந்த விபரங்களை சொன்னாள். விஷ்ணு படித்துக் கொண்டே போலீஸ் இன்பார்மராகவும் வேலை செய்து வருகிறான், எஸ்.பி. கோகுல் மூலமாத்தான் ரம்யாவிற்கு அறிமுகம், படிப்பு முடிந்தவுடன் ரம்யாவை திருமணம் செய்து கொள்வதாக வாக்கு கொடுத்திருந்தான்.

தன் காதலன் விஷ்ணுவிடமும் பொறுப்பை ஒப்புக்கொடுத்து விட்டதால் நிம்மதியாக ஆபிஸ் போய் வந்து கொண்டிருந்தாள், கேட்பவர்களிடம் எல்லாம் சுதா சொந்த ஊர் சென்று இருப்பதாக சொல்லி சமாளித்து வந்தாள்.

விஷ்ணு அடிக்கடி எஸ்.பி. கோகுலை கேஸ் விஷ்யமாக சந்திப்பது வழக்கம், ஆனால் விஷ்ணு எஸ்.பியை எங்கு தேடியும் காணாமல் ஸ்டேஷனில் கேட்க, அவர் லீவில் இருப்பதாக தெரிய வந்தது. இன்பார்மர் வேலை ஆபத்தானது என்றாலும் அவனுக்கு அதில் ஒரு திரில் இருந்தது.

விஷ்ணுவிற்கு தானே துப்பறிந்தால் என்ன என்ற எண்ணம் வர, தனியாக இறங்குவதை விட, தன்னுடைய நண்பர் கிரைம் ப்ரான்ச் ஆபிஸர் குமாரிடம் விபரம் சொல்லி அவருடன் சேர்ந்து தேடுதல் வேட்டையை ஆரம்பிக்கலாம் என்று முடிவெடுத்தான்.

விஷ்ணு ரம்யாவை, மீண்டும் மர்ம நபரின் மொபைலுக்கு அழைக்கும் படி சொல்ல, அந்த மர்ம நபர் கொடுத்த நம்பருக்கு டயல் செய்தாள்.

போனை எடுத்த அந்த மர்ம நபர், இன்னும் இரண்டு நாளில் சுதாவை விடுவித்து விடுவதாகவும் அதுவரை போலீஸ் பக்கம் எட்டிப் பார்த்தால் சுதாவை தீர்த்து விடுவேன் என்ற மிரட்டலோடு போனை துண்டித்து விட்டான்.சுதாவை அந்த மர்ம நபர் எதற்காக கடத்த வேண்டும்,என் சுதாவிற்கு எந்த ஆபத்தும் ஏற்படாமல் இருக்க வேண்டுமே, என்று கண்ணீர் மல்க விஷ்ணுவிற்கு போன் செய்தாள் ரம்யா.

விஷ்ணு தன் விசாரணையை ரம்யாவிடமிருந்தே ஆரம்பித்தான், இருவரிடமும் நெருக்கமாக பழகியவர்களைப் பற்றி விசாரித்தான்.ரம்யா சென்னை வந்து கொஞ்ச நாட்களே ஆனதால் தூரத்து சொந்தமான எஸ்.பி.கோகுலையும் ஆபிஸில் வேலை பார்க்கும் ஒரு சிலர் மட்டுமே தங்களுக்கு பழக்கம் என்றும் தெரிவித்தாள்.

எஸ்.பி. கோகுலுக்கு இதில் தொடர்பு இருப்பதாக படவே, அவரைப் பற்றி துப்பு துலக்கலாம் என்ற பொழுது அவர் ஊரில் இல்லாதது நினைவில் வர அவருக்கு போன் செய்து விசாரித்தான்,அவர் அவசரப்பட வேண்டாம், ரம்யா இது விஷயமாக தன்னிடம் சொன்னதாகவும். இன்னும் இரண்டு நாள் பொறுக்கும் படியும் சொன்னார். விஷ்ணுவிற்கு எஸ்.பி. கோகுல் மீது சிறு சந்தேகப் பொறி தட்டியது.ஆனால் ஒரு சூப்ரெண்டெண்ட் ஆப் போலீஸ் எப்படி இதில் ஈடுபட்டிருக்க முடியும் என்ற குழப்பமும் இருந்தது.மர்ம மனிதனும் எஸ்.பியும் ஒரே போல் இரண்டு நாள் என்று சொல்ல சந்தேகம் வலுத்தது.முதலில் யார் மீது சந்தேகம் ஏற்படுகிறதோ அது என்றுமே விஷ்ணுவை பொறுத்தவரை தவறுவதில்லை.

ரம்யாவிற்கு அந்த மர்ம நபரிடம் இருந்து கால் வர அச்சத்துடன் எடுத்தவளுக்கு, இந்த விஷயமாக இன்ஃபார்மர் விஷ்ணுவுடன் ரம்யா கொண்டிருக்கும் தொடர்பு தனக்கு தெரியும் என்றும், தன் சொல்படி கேட்டால் சுதாவை உயிருடன் மீட்கலாம் என்றும், விஷ்ணுவை குழப்ப தான் சொல்லும் சுதா இருக்கும் இடம் பற்றிய கோர்ட் வேர்டை தெரிவிக்கும் படி சொல்ல, அதனை குறித்துக் கொண்டவள் உடனே விஷ்ணுவிற்கு சொல்லி, அவனை பொறுமையாய் இருக்கும் படியும் வேண்டிக் கொண்டாள்.

இந்த கோர்ட் வேர்டெல்லாம் கண் துடைப்பு என்று விஷ்ணுவிற்கு தெரியும், எனவே சந்தேகம் ஊர்ஜிதமானது, காயை எப்படி நகர்த்தி,எஸ்.பிக்கு தொடர்பு இருக்கிற உண்மையை வெளிக் கொண்டு வருவது என்று யோசிக்க ஆரம்பித்தான். ஒன்றும் அறியாதது போல் ரம்யா தந்த கோர்ட் வேர்டை சிறிய திருத்தத்துடன் வேண்டுமென்றே எஸ்.பி. கோகுலிற்கும் போன் செய்து தெரிவித்தான்.

இன்பார்மர் விஷ்ணு, கிரைம் ப்ரான்ச் ஆபிஸர் குமாருக்கு, சார் எஸ்.பி.கோகுலிடம் நான் தவறான குறீயிட்டை தான் கொடுத்திருக்கிறேன்,கவலை வேண்டாம் என்ற ஒரு மெசேஜையும், எஸ்.பி. கோகுலிற்கு அனுப்பிய கோர்ட் வேர்ட் S W H2 6F நகலையும் உடன் அனுப்பினான்..

கிரைம் குமாருக்கும் எஸ்.பி. கோகுல் மீது ஒரு சந்தேகக்கண் இருந்தது, சுதா ரம்யா இருவருக்கும் நெருக்கமாக அவரைத் தானே தெரியும், அப்படியிருக்க விஷ்ணு ஏன் கோகுலிற்கு கோர்ட் வேர்டை அனுப்ப வேண்டும், எஸ்.பி. கோகுலை குழப்பவே, இந்த கோர்ட் வேர்டை தெரிவித்திருப்பதை போன் மூலம் தெரிவித்தான் இன்பார்மர் விஷ்ணு.

இதற்கிடையில் ரம்யாவும் தனக்கு மனசு சரியில்லை என்றும், ஊர் வரை சென்று வருகிறேன் என்று விஷ்ணுவிடம் சொல்லி விட்டு கிளம்பினாள். மிகவும் அசதியாக இருக்க விஷ்ணுவும் ஓய்வு எடுக்க தன் அறைக்கு சென்றான்.

ஆழ்ந்த தூக்கத்தில் இருந்த விஷ்ணுவின் போன் அலற, போனில் கிரைம் குமார் தான் சொல்லும் இடத்திற்கு உடனே கிளம்பி வரும்படி சொல்லி விட்டு போனை துண்டித்து விட்டார்.

மனம் கொந்தளிக்க பைக்கை எடுத்துக் கொண்டு, குமார் சொன்ன இடத்திற்கு விரைந்தான் விஷ்ணு, கிரைம் குமார் ஒரு வீட்டின் முன் படபடப்புடன் காத்திருந்தார்.

வீட்டின் கேட் கதவு உட்புறமாக தாழிட்டு இருக்க, இருவரும் சத்தம் வராமல் ஏறி குதித்தனர்.வீட்டு வாயிலை அடைந்ததும் காலிங் பெல்லை அழுத்தலாமா என்று பார்வையாலேயே கேட்ட விஷ்ணுவிடம் சிறிது பொறுக்கும் படி சொன்னார் குமார். உள்ளே இரண்டு ஆண்குரலும் பெண்குரலும் கிசுகிசுப்பாக பேசுவது கேட்டது, ஆண்குரல் எஸ்.பி. தான், ஆனால் இந்த பெண் குரல்,மற்றும் இன்னொரு குரல் மர்ம நபராக இருக்குமோ என்று யோசித்து கொண்டிருக்கையிலேயே வாசல் கதவு திறக்கப்பட்டது, இருவரும் ஓடி சென்று உள்ளே நுழைந்து வெளியே வரவிருந்தவர்களை மீண்டும் உள்ளே தள்ளினர்.விஷ்ணுவிற்கு நம்ப முடியவில்லை, அவர்கள் யாரும் இல்லை, எஸ்.பி. கோகுலும், எஸ்.பியின் மகன் அரவிந்தும், காதலி ரம்யாவும் தான், உள்ளே முனகல் சத்தம் கேட்ட அறையை நோக்கி சென்ற விஷ்ணு ,சுதா மயக்கத்தில் இருப்பதை பார்த்து, குமார் சார், அரவிந்தை அரெஸ்ட் செய்யுங்கள், அவன் தான் குற்றவாளியாக இருக்க முடியும், என்றான்.

கிரைம் குமார் சிரித்த படி எனக்கு முன்பே ரம்யா, சுதாவை காப்பாற்ற முயற்சிப்பாள் என்ற சந்தேகம் இருந்தது, அவள் ஊர் செல்வதாக சொல்லவும் பின் தொடர்ந்தேன், என் கணிப்பு தவறவில்லை, அவள் இங்கு ஒரு பெட்டியுடன் வர, எஸ்.பி கோகுல் வந்து கதவை திறந்தார், உடனே தான் உனக்கு போன் செய்தேன்..

எஸ்.பி.மகன் அரவிந்தையும், ரம்யாவையும் விசாரிப்போம். உண்மையை கக்கி விடுவார்கள் என்றார் கிரைம் குமார் அசால்டாக..

ரம்யா தன் தோழி சுதாவை மீட்கவே இங்கு வந்திருக்க வேண்டும் என்ற நம்பிக்கையில் பின் தொடர்ந்தான் விஷ்ணு.

--ஆசியா உமர்..

குறிப்பு:

சவால் சிறுகதை-2011 போட்டி பற்றிய விபரத்தைக் காண திரு.பரிசல்காரன்,திரு ஆதிமூலகிருஷ்ணன், யுடான்ஸ் ஆகியோரின் பதிவுகளைக் காணலாம்.

மேற்கண்ட படத்தை தந்து கதை எழுத அறிவிச்சிட்டாங்க, நாம என்ன பரம்பரை எழுத்தாளரா? சரி பார்டிசிபேஷன் சர்டிபிகேட்டாவது கிடைக்காதா என்ன? போன வருடமும் கலந்து,விபரம் தெரியாமல் சவால் வரிகளை அடுக்கி எழுதி அந்தக் கதை இப்ப எதுக்கு?

--ஆசியா உமர்..

ஆதாமிண்ட மகன் அபு - என் பார்வையில்..

2011-10-24T17:22:00.021+04:00

ஆதாமிண்ட மகன் அபு படத்தை பார்க்கவேண்டும் என்று கொஞ்ச நாட்களாக நினைத்து கொண்டிருந்தேன்,எனது சகோதரர் இந்தப்படத்தைப் பார் என்று அதன் டிவிடியை கொடுக்கும் பொழுது எனக்கு மட்டற்ற மகிழ்ச்சி என்று தான் சொல்ல வேண்டும், படம் பார்க்கும் பொழுது மேலுள்ள புகைப்படத்தை கிளிக் செய்தேன். முக்கிய கதாபாத்திரங்கள் அனைவரும் இருப்பது போல் அமைந்த புகைப்படம் இது.

துபாயில் படத்தின் இயக்குனர் சலீம் அகமது அவர்களுக்கு பாராட்டு விழா நடந்த பொழுது எனது அண்ணன் இயக்குநருடன்.

ஆஸ்கார் விருதுக்கு ஒவ்வொரு ஆண்டும் இந்தியா சார்பில் படங்களை தேர்வு செய்து அனுப்பி வைப்பார்கள். அந்த வரிசையில் இந்த ஆண்டு மலையாள படமான 'ஆதாமிண்ட மகன் அபு' என்ற திரைப்படம் ஆஸ்கார் விருதுக்கு தேர்வு செய்யப்பட்டுள்ளது.

'ஆதாமிண்டே மகன் அபு' படத்தின் இயக்குனர் சலீம் அகமது. இப்படம் இந்த ஆண்டு 4 தேசிய விருதுகளை பெற்றது. ஆடுகளத்திற்கு ஆறு தேசிய விருதுகள் கிடைத்தது நினைவிருக்கலாம்.

ஆதமிண்டே மகன் அபூ படத்தில் நாயகனாக நடித்த சலீம் குமார் சிறந்த தேசிய நடிகராக தேர்வு பெற்று, தனுஷுடன் சேர்த்து விருதளித்துக் கெளரவிக்கப்பட்டார்.இந்தப்படத்தின் இயக்குநர் இந்த கதைக்கான கரு பத்து வருடமாக தன் மனதில் உருபெற்று அது திரைபடமாக உருவானதாக தெரிவித்திருக்கிறார்.

படத்தில் அபூவாக மலையாள காமெடி நடிகர் சலீம் குமாரும்,ஆயிசும்மாவாக ஹிந்தி நடிகை ஸரீனா வஹாபும் நடித்துள்ளனர்.

அபூ,ஆயிசும்மா வயதான தம்பதியர்கள். அபூ அத்தர்(வாசனை திரவியம்) , இஸ்லாமிய புத்தகங்கள,கைமருந்துகளும் நடந்தே சென்று விற்றுவரும் வியாபாரி.ஆயிசும்மா மாடு கன்று வளர்த்தும், அதனின்று பாலைக்கறந்து விற்றும் பணம் ஈட்டி வருகிறார்.அவர்களுக்கு புனித ஹஜ்யாத்திரை மேற்கொள்ள வேண்டும் என்ற எண்ணம் ஏற்பட்டு பல வருடங்களாக பணம் சிறிது சிறிதாக சேமித்து வருகிறார்கள்.அபூவின் நண்பர்கள் உதவி செய்ய தயாராக இருந்தும், அபூ தம்பதியினர் இஸ்லாமிய சட்டதிட்டங்களுக்கு உட்பட்டு தங்கள் வருமானத்தில் சேமித்த பணத்தில் இருந்தே ஹஜ் செய்ய வேண்டும் என்பதே அவர்களின் எண்ணமாக இருக்கிறது.அந்த முயற்சியே கதையாக உருவாகியுள்ளது.

இப்படத்தில் மத நல்லிணக்கத்தின் முக்கியத்துவத்தை இயக்குனர் மிகவும் அழகாக சித்தரித்துள்ளார்.

படம் பாங்கு சத்தத்தோடு ஆரம்பித்து ஹஜ் பெருநாள் காலை தக்பீர் முழக்கத்துடனும், பாங்கு சத்தத்துடன் முடிகிறது.

படத்தில் இடம்பெற்ற பாடல்கள் அனைத்தும் இனிமையானவை, இந்த மக்கா மதீனத்தில் பாடலை கேட்டுப்பாருங்க.

இந்தப்படத்தின் ஒளிப்பதிவும், இசையும் மிகவும் ரசிக்கும் படியிருக்கும்.

இந்த படத்தின் நாயகர் அபுவைப் போலவே உள்ள தோற்றத்துடன் எங்கள் ஊரில் அத்தர்,பத்தி விற்கும் ஒருவர் இன்னமும் இருந்து வருகிறார்.இந்தப் படத்தை பார்க்கும் பொழுது அவருடைய நினைவு வந்தது. தள்ளாத வயதிலும் நடந்து சென்று வியாபாரம் செய்து வருவது ஆச்சரியத்தை ஏற்படுத்தும் விஷயம் தான்..

எல்லாம் வல்ல அல்லாஹ்வின் அருளால் புனித ஹஜ் கடமையை நிறைவேற்றவிருக்கும் என் சகோதரர் ஜனாப்.கலந்தர் குடும்பத்தினருக்கு எங்களின் துவாக்களும் வாழ்த்துக்களும்.

--ஆசியா உமர்.

நன்றி கூகிள்...

சிக்கன் ஃப்ரான்க்ஸ் மசாலா

2011-10-23T15:26:00.009+04:00

தேவையான பொருட்கள்:

சிக்கன் ஃப்ரான்க்ஸ் - ஒரு பாக்கெட்

வெங்காயம் - 2

தக்காளி - 2

பச்சை மிள்காய் -1

மல்லி இலை - சிறிது

இஞ்சி பூண்டு பேஸ்ட் - 2டீஸ்பூன்

கரம் மசாலா - கால்டீஸ்பூன்

மஞ்சள் தூள் - கால்டீஸ்பூன்

மிள்காய்த்தூள் - அரைடீஸ்பூன்

மிளகுத்தூள் - அரைடீஸ்பூன்

சீரகத்தூள் - அரைடீஸ்பூன்

எண்ணெய் - தேவைக்கு

உப்பு - தேவைக்கு.

முதலில் சிக்கன் ஃப்ரான்க்ஸ் ஒரு பாத்திரத்தில் தண்ணீர் விட்டு கொதி வந்ததும் போட்டு வேகவைத்து வடித்து கொள்ளவும்.5 நிமிடத்தில் வெந்து விடும்.ஆறியவுடன் சிறிய வட்டமாக கட் செய்து கொள்ளவும்.வெங்காயம்,தக்காளி,பச்சை மிள்காய், மல்லி இலை கட் செய்து கொள்ளவும்.

கடாயில் எண்ணெய் விட்டு காய்ந்ததும், வெங்காயம் வதக்கி இஞ்சி பூண்டு பேஸ்ட்,கரம் மசாலா போட்டு வதக்கவும்.தக்காளி,நறுக்கிய பச்சை மிளகாய் சேர்த்து சிறிது உப்பு சேர்க்கவும்.நன்கு வதங்கட்டும்.

கட் செய்த சிக்கன் ஃப்ரான்க்சை சேர்க்கவும்.சிக்கன் ப்ரான்க்ஸில் உப்பு இருக்கும்,எனவே உப்பு பார்த்து சேர்க்கவும்.

மஞ்சள்,மிளகாய்,மிளகு,சீரகத் தூள்களை சேர்க்கவும்.பிரட்டி விடவும். சிறிது தண்ணீர் தெளித்து மூடி போடவும்.

இப்படி பிரட்டியது போல் வரும். நறுக்கிய மல்லி இலை தூவி இறக்கவும்.

சுவையான சிக்கன் ப்ரான்க்ஸ் மசாலா ரெடி.

இதனை சாதம், குபூஸ், சப்பாத்திக்கு தொட்டு சாப்பிடலாம்.

எங்க உறவின பேச்சிலர்ஸ் ரூமில் அவசரத்திற்கு இப்படி மசாலா செய்து சாப்பிடுவதாக சொன்னார்கள். நான் என் முறையில் செய்து பார்த்தேன்.பிடித்திருந்தது..சிக்கன் ப்ரான்க்ஸ் வாங்கும் பொழுது பிடித்த குறிப்பிட்ட ப்ராண்ட் வாங்க வேண்டும். நான் சாதியா சிக்கன் ஃப்ரான்க்ஸ் உபயோகித்து செய்திருக்கிறேன்..

--ஆசியா உமர்..

ஆட்டுக்கால் பிரியாணி

2011-10-18T14:38:00.014+04:00

தேவையான பொருட்கள்:

பிரியாணி அரிசி - அரைக் கிலோ

ஆட்டுக்கால் - 2 செட்

இஞ்சி பூண்டு பேஸ்ட் - 2டேபிள்ஸ்பூன்

கரம் மசாலா - அரை டீஸ்பூன்

வெங்காயம் - 150 கிராம்

தக்காளி - 150 கிராம்

பச்சை மிள்காய் - 4

மல்லி,புதினா,கருவேப்பிலை - சிறிது

எண்ணெய் -50 மில்லி

நெய் -50மில்லி

மஞ்சள் தூள் - அரைடீஸ்பூன்

மிளகாய்த்தூள் -அரைடீஸ்பூன்

மிளகுத்தூள் - அரைடீஸ்பூன்

சீரகத்தூள் - அரைடீஸ்பூன்

தயிர் - 2டேபிள்ஸ்பூன்

உப்பு - தேவைக்கு.

முதலில் சுத்தம் செய்த ஆட்டுக்காலை குக்கரில் மூழ்கும் அளவு தண்ணீர் சேர்த்து அரை மணி நேரம் வேகவைத்து எடுக்கவும்.மூன்று விசில் வந்தவுடன் சிம்மில் வைத்து வேக வைக்கவும்.வெந்தவுடன் தனியாக எடுத்து வைக்கவும்.நறுக்க வேண்டியவைகளை நறுக்கி வைக்கவும்.

பிரியாணி செய்யும் பாத்திரத்தில் எண்ணெய் நெய் விட்டு காய்ந்ததும் இரண்டு இணுக்கு கருவேப்பிலை போட்டு வெடிக்க விடவும்.

நறுக்கிய வெங்காயம் சேர்க்கவும். சிவற வதக்கவும்,இஞ்சி பூண்டு பேஸ்ட் கரம் மசாலா சேர்த்து சிம்மில் வைத்து சிறிது வேக விடவும்.

நறுக்கிய தக்காளி, மல்லி, புதினா,மிளகாய் சேர்க்கவும்.சிறிது உப்பு சேர்த்து மசிய விடவும்.

நன்கு மசிந்ததும் மிளகாய்த்தூள்,மஞ்சள் தூள், மிளகு சீரகத்தூள் சேர்த்து

சிறிது வதக்கவும்.
வதங்கியவற்றுடன் தயிர் 2டேபிள்ஸ்பூன் சேர்க்கவும்.

நன்றாக பிரட்டி விடவும்,எண்ணெய் தெளிந்து மேலே வரும்.

அரிசி அளவை பொருத்து ஒன்றுக்கு ஒன்றரை அல்லது இரண்டு அளவு தண்ணீர் சேர்க்கவும், வேக வைத்த ஆட்டுக்கலையும் சேர்க்கவும்.அதில் இருக்கும் தண்ணீரையும் கணக்கில் வைக்கவும்.

பிரியாணி மசாலா ,ஆட்டுக்கால் எல்லாம் சேர்ந்து கொதி வரவும், சுத்தம் செய்து கழுவிய அரிசியை சேர்க்கவும்.

உப்பு சரி பார்த்து மூடி விடவும்,தீயை மிதமாக வைக்கவும்,தண்ணீர் வற்றி வரும் பொழுது சிம்மில் வைக்கவும். நன்றாக அரிசி வெந்து பிரியாணி ரெடியானவுடன் அடுப்பை அணைக்கவும்.அடி பிடிக்காமல் இருக்க 10 நிமிடம் சிம்மில் அடுப்பை வைக்கும் பொழுது கீழே ஒரு பழைய தோசைக்கல்லை வைக்கலாம்.

சுவையான ஆட்டுக்கால் பிரியாணி ரெடி.

ஆட்டுக்காலின் சுவையிடனும் பிசுபிசுப்புடனும் இருக்கும். புதினா துவையல் , சிப்ஸ் உடன் சாப்பிட அருமையாக இருக்கும்.

--ஆசியா உமர்.